Në Qendrën Klinike Universitare të Kosovës ka nisur një mision humanitar me rëndësi të veçantë për shëndetin e fëmijëve. Një ekip i specializuar i mjekëve nga Turqia, në kuadër të organizatës ndërkombëtare Muntada Aid, po kryen ndërhyrje kirurgjikale për 12 fëmijë të lindur me sëmundje të rënda në zemër.
Shërbimi Spitalor Klinik dhe Universitar i Kosovës (ShSKUK) ka bërë me dije se në bashkëpunim të ngushtë me Klinikën e Pediatrisë, Klinikën e Kirurgjisë së Fëmijëve, Klinikën e Anestezionit dhe Klinikën e Neonatologjisë, është realizuar me sukses ndërhyrja e parë e këtij lloji në Ballkan, për trajtimin kirurgjikal të një të porsalinduri me atresion të arteries pulmonare një gjendje serioze që rrezikon jetën.
Në njoftim thuhet se falë përkushtimit të profesionistëve dhe bashkëpunimit të frytshëm me ekipin turk, ky intervenim i ndërlikuar përfundoi me sukses dhe i dha foshnjës shansin për një jetë normale.
Po ashtu theksohet se ky operacion është pjesë e një misioni humanitar që ka për synim ofrimin e trajtimit për 12 fëmijë me sëmundje të rënda kardiake, të cilët aktualisht po operohen në QKUK, nga kardiokirurgë dhe specialistë nga Turqia.
“Shërbimi Spitalor Klinik dhe Universitar i Kosovës (ShSKUK) ka shprehur mirënjohje të thellë për organizatën Muntada Aid dhe për mjekët turq, përfshirë Prof. dr. Ilker Yucel, Prof. dr. Halil Demir, Prof. dr. Oktay Korun, Dr. Abid Karagoz, si dhe ekipin vendor me Dr. Ramush Bejiqin dhe stafin përcjellës. Ky mision është dëshmi e fuqisë së bashkëpunimit dhe përkushtimit në shërbim të jetës”, thuhet tutje në njoftim.
