Organizata e Veteranëve të Luftës së Ushtrisë Çlirimtare të Kosovës ka reaguar ndaj deklaratës së Ekaterina Trendafilovës, kryetare e Dhomave të Specializuara të Kosovës, se selia e Gjykatës Speciale nuk mund të ishte në Kosovë për shkak të rrezikshmërisë për dëshmitarët, është e pavërtetë dhe e pabazuar.
Organizata e Veteranëve të Luftës së Ushtrisë Çlirimtare të Kosovës duke demantuar deklaratën e Trendafilovës përmendi gjykimet e nisura nga UNMIK-u, pastaj nga EULEX-i dhe më vonë edhe nga gjykatat vendore.
“Këto procese kanë përfshirë hetime, arrestime, gjykime dhe dënime konkrete. Në asnjërën prej tyre nuk është dëshmuar ndonjë rast sistematik të frikësimit të dëshmitarëve, aq më pak që të ketë pasur rrezik për jetën e tyre. Ky realitet fakton qartë se ka ekzistuar atmosferë për gjykime edhe në Kosovë, madje edhe në kohë shumë më të ndjeshme se sot, menjëherë pas luftës, kur emocionet dhe pasojat ishin ende të freskëta”, thuhet në reagimin e OVL të UÇK-së.
Tutje kjo organizatë vuri në dukje se pretendimi se drejtësia për UÇK-në mund të vendosej vetëm jashtë Kosovës, bie ndesh me të vërtetën faktike dhe me përvojën që nga përfundimi i luftës të proceseve që janë zhvilluar në vendin tonë.
