Vendimi nga një panel prej tre gjyqtarësh në Gjykatën e Tregtisë Ndërkombëtare me seli në Nju Jork erdhi pas disa padive që pretendonin se Trump tejkaloi autoritetin e tij, e bëri politikën tregtare të SHBA-së të nënshtruar tekave të tij dhe shkaktoi kaos ekonomik.
“Urdhrat globalë dhe hakmarrës për tarifat tejkalojnë çdo autoritet të dhënë Presidentit nga IEEPA për të rregulluar importet përmes tarifave”, shkroi gjykata, duke cituar Aktin Ndërkombëtar të Fuqive Ekonomike të Emergjencës të vitit 1977.
Gjykata thekson gjithashtu se përdorimi i taksave doganore si levë është i papranueshëm, jo sepse është i paarsyeshëm dhe joefikas, por sepse ligji nuk e lejon atë.
Administrata Trump thuhet se paraqiti një apel dhe zyrtarët e Shtëpisë së Bardhë iu përgjigjën vendimit me deklarata publike duke sfiduar autoritetin e gjykatës.
“Nuk u takon gjyqtarëve të pazgjedhur të vendosin se si të trajtojnë siç duhet një emergjencë kombëtare”, tha Kush Desai, një zëdhënës i Shtëpisë së Bardhë.
Tregjet financiare, në të kundërt, e mirëpritën vendimin. Dollari amerikan u rimëkëmb pas vendimit të gjykatës, veçanërisht duke u forcuar kundrejt monedhave të tilla si euro, jeni dhe franga zvicerane.
Vendimi, nëse mbështetet, i hap një boshllëk të madh strategjisë së Trump për përdorimin e tarifave të larta për të detyruar partnerët tregtarë të bëjnë lëshime, për të rikthyer vendet e punës në prodhim në SHBA dhe për të zvogëluar deficitin tregtar të mallrave në SHBA, të cilat ishin ndër premtimet e tij kryesore të fushatës.
