Presidentja e vendit, Vjosa Osmani, në cilësinë e Komandantes Supreme të Forcës së Sigurisë së Kosovës, sot ka vizituar ushtrimin “Defender Europe ’25”, ku Kosova jo vetëm që merr pjesë, por është edhe nikoqire.
Në një postim në Facebook, Osmani ka thënë se Kosova po shkruan një kapitull të ri të bashkëpunimit ushtarak ndërkombëtar.
“Sot, në cilësinë e Komandantes Supreme të Forcës së Sigurisë së Kosovës, vizitova Defender Europe ’25 – ushtrimin më të madh të këtij viti të US Army Europe, ku Kosova jo vetëm që merr pjesë, por ka edhe nderin të jetë nikoqire. Krah për krah me forcat e armatosura të Shteteve të Bashkuara të Amerikës dhe aleatëve tjerë të NATO-s, vendi ynë po shkruan një kapitull të ri të bashkëpunimit ushtarak ndërkombëtar”, ka shkruar Osmani në Facebook.
Vetëm dy ditë më parë, Osmani ka sqaruar se në SHBA, kanë diskutuar për vizionin e përbashkët për mbrojtjen e Evropës.
E para e vendit ka thënë se Kosova ka dhënë një mesazh të qartë që jo vetëm kontribuon, por është e gatshme të jetë pjesë e NATO-s.
“Sot, ky vizion po zbatohet në terren, në tokën tonë, përmes Defender Europe ’25 – një ushtrim i përmasave të jashtëzakonshme që dëshmon përkushtimin ndaj paqes dhe sigurisë. Rreth 1000 pjesëtarë të FSK-së janë të angazhuar drejtpërdrejt – profesionistë të barabartë me aleatët nga vendet më të fuqishme të botës. Ky është një mesazh i qartë: Kosova jo vetëm që kontribuon, por është e gatshme të jetë pjesë e NATO-s”, ka shkruar tutje Osmani.
