Në prag të Ditës Botërore kundër duhanit, Ministria e Shëndetësisë në bashkëpunim me Institutin Kombëtar të Shëndetit Publik të Kosovës organizoi konferencë për media, ku u diskutua për sfidat dhe përpjekjet institucionale për reduktimin e duhanpirjes në vend.
Në konferencë mori pjesë edhe ministri në detyrë i Shëndetësisë, Arben Vitia, përfaqësues nga IKSHPK dhe nga KADAC.
Ministri Vitia tha se duhani mbetet një nga kërcënimet më të mëdha për shëndetin publik, derisa përmendi edhe masat që janë ndërmarr nga kjo ministri.
“Duhani sjellë pasoja të rënda shëndetësore, mbi 8 milionë njerëz në vit vdesin si pasojë e pirjes së duhanit. Në Kosovë ka rënie të numrit të përdorimit të duhanit krahasuar me vitin 2011. IKSHPK ka kryer hulumtime dhe do të ofrojë së shpejti të dhëna të reja rreth përdorimit të duhanit tek të rinjtë. Por kjo nuk mjafton. Përkundër sfidave, nuk kanë munguar as rezultatet sikurse rritja e akcizës, inspektimet dhe presim rritje të numrit të inspektorëve për shtim të inspektimeve në hapësira ku është e ndaluar duhanpirja”, theksoi ministri në detyrë, Arben Vitia.
Sipas të dhënave nga IKSHPK, një përqindje e konsiderueshme e popullsisë në Kosovë vazhdon të jetë e ekspozuar ndaj përdorimit të të duhanit, përfshirë edhe të rinjtë.
Faik Hoti nga ky Institut, tha se janë duke zhvilluar aktivitete dhe hulumtime në mënyrë që të ulin përdorimin e duhanit sidomos në mesin e të rinjve.
“Që nga hyrja në fuqi e ligjit kundër duhanit, hulumtimet tona që janë zhvilluar kanë nxjerrë në pah një ulje të përdorimit, porse në luftën kundër duhanit ne presim çdo herë përmirësim të uljes së nivelit të duhanpirjes në vend”, tha ai.
Megjithëse ligji për kontrollin e duhanit është miratuar që nga viti 2013, megjithatë, zbatimi i tij vazhdon të hasë në sfida serioze, sidomos në ambientet ku ndalohet duhan-pirja.
Dita Botërore kundër duhanit shënohet çdo vit më 31 maj.
