Oda e Fizioterapeutëve të Kosovës njofton për një nga arritjet më të jashtëzakonshme, të drejtën për organizimin dhe mbajtjen e mbledhjes së përgjithshme të Fizioterapisë Botërore-Regjioni i Evropës në Prishtinë.
Ky do të jetë takimi i 15-të me radhë dhe do të mbahet më 14-15 maj të vitit 2026.
Ky është një moment historik për mjekësinë, profesionin e fizioterapisë dhe për Republikën e Kosovës. Vetëm gjashtë vite pas pranimit në WCPT, falë angazhimit të palodhshëm dhe përkushtimit profesional, kemi fituar besimin e Bordit Ekzekutiv të ER-WCPT për të organizuar këtë ngjarje të madhe. Njëherit i falënderojmë anëtarët e Bordit Ekzekutiv të ER-WCPT-së Esther-Mary D’Arcy, Carmen Suárez, Tim Németh, Michele Cannone dhe Katri Partanen.
Në mbledhjen e përgjithshme do të marrin pjesë të gjithë kryetarët dhe përfaqësuesit e organizatave të fizioterapisë nga Evropa.
“Organizimi dhe mbajtja e ‘General Meetings’ do të ndodh në përvjetorin e dhjetë të themelimit të Odës së Fizioterapeutëve të Kosovës. OFTK për kaq pak vite po e shkruan historinë duke e shndërruar Kosovën në qendër botërore të fizioterapisë. Kjo ngjarje do të kontribuojë në avancimin dhe afirmimin e profesionit dhe rolit të fizioterapisë në Kosovë”, njofton Oda e Fizioterapeutëve të Kosovës.
