Prishtina do të shndërrohet këtë të diel, më 1 qershor 2025, në një qendër shumëngjyrëshe për nder të Ditës Ndërkombëtare të Fëmijëve. Drejtoria e Kulturës dhe Drejtoria për kanë përgatitur një program të pasur që do të zhvillohet në disa prej shesheve kryesore të kryeqytetit.
Asambleja e fëmijëve të Prishtinës mban mbledhjen solemne duke filluar nga ora 10:00, ndërsa në orën 11:00 nis parada “Ec me fëmijët”.
Në Sheshin “Skënderbeu”, fëmijët do të kenë mundësi të marrin pjesë në turne sportive nga ora 11:00 deri në 16:00, duke përfshirë:
Futboll të vogël, basketboll 3×3, volejboll, karate, ping-pong, shah, gjimnastikë, boks.
Ndërkohë, Sheshi “Zahir Pajaziti” do të jetë epiqendra e aktiviteteve artistike, kulturore dhe argëtuese:
Nga ora 11:30, aktivitetet fillojnë me fjalën përshëndetëse të kryetarit të Prishtinës, Përparim Rama.
Deri në orën 16:00 do të vazhdojë një program artistik me performanca nga SHML “Prenk Jakova”, Orkestra “Amadeus” dhe Qendra Kulturore e Fëmijëve.
Muri i dëshirave “Çfarë mund të bëj unë për Prishtinën time?”, kënde leximi, informimi policor dhe kënde dhuratash do të jenë të hapura për fëmijët gjatë gjithë ditës.
Fëmijët do të mund të shijojnë aktivitete të ndryshme si face painting, lojëra me balona, lojëra Sumo, këndin e Minecraft-it dhe punëtoritë me robotikë dhe teknologji 3D.
Në orën 16:00 do të shfaqet filmi “Ciklik”, i cili do të pasohet me një panel diskutimi për parandalimin e bullizmit tek të rinjtë.
Mbrëmja do të përmbyllet me baletin “Transformim” nga ora 20:00 deri në 20:50.
“Prishtina ime!” është motoja që bashkon këtë festë, duke reflektuar dashurinë për qytetin dhe përkushtimin për fëmijët, të cilët janë e ardhmja e saj.
“Ju ftojmë të na bashkoheni këtë të diel për një ditë të veçantë, plot argëtim, krijimtari dhe dashuri për fëmijët tanë”, theksohet në njoftimin e Komunës së Prishtinës. 
