50 alpinistë duke përfshirë edhe ambasadorin gjerman në Kosovë, Jorn Rohde, të prirë nga alpinistja e njohur shqiptare, Uta Ibrahimi, kanë nisur serinë e vitit 2025 “Ecje me Ambasadorin”.
Këtë iniciativë ata e nisën me një ngjitje drejt Majës së Konjushkës në malet e Sharrit.
“Me një grup prej mbi 50 alpinistësh, përfshirë edhe pjesëtarë të Divizionit Malor të Ushtrisë Gjermane që shërbejnë në KFOR, ishte një mundësi e shkëlqyer për t’u takuar dhe lidhur me ushtarët tanë”, shkruan në facebook Ambasada Gjermane.
Në postim specifikohet suksesi i radhës i Ibrahimit, e cila përfundoi misionin e saj për të ngjitur të gjitha 14 majat mbi 8,000 metra, duke përfshirë edhe Kangchenjunga, malin e tretë më të lartë në botë.
“Së bashku vazhduam përpara, duke fituar lartësi nëpër mjegull të dendur dhe re. Por, kur arritëm te Liqeni i Konjushkës, pranë majës, u mor vendimi që të ktheheshim mbrapa për siguri. Mali gjithmonë fiton dhe mirëqenia e grupit ishte përparësia kryesore. Kishim planifikuar të takoheshim me kolegët tanë nga Ambasada Gjermane në Shkup në majë – fatkeqësisht, kjo nuk ndodhi. Respekt i madh për Ambasadorin Drexler që arriti në majë”, vazhdon postimi.
