Kryetari i Aleancës për Ardhmërinë e Kosovës, Ramush Haradinaj, ka përkujtuar sot 31 Majin si një ditë të heroizmit dhe sakrificës së jashtëzakonshme të luftëtarëve të lirisë, duke nderuar veçanërisht emrat e atyre që ranë në këtë datë për idealin e lirisë dhe bashkimit kombëtar.
“Në këtë datë përkujtojmë me nderim heronjtë Xhemajl Fetahaj dhe Milazim Shala, dy trima që u bënë pjesë e një momenti vendimtar në historinë tonë. Thyerja e kufirit që për një shekull ndau shqiptarët, ishte ëndërr e shumë brezave. Ata, me guximin e tyre, i dolën përballë rrezikut, për ta mbrojtur nderin e Atdheut dhe për ta shkruar me gjak historinë e tij”, ka shkruar Haradinaj.
Ai ka kujtuar me krenari edhe Operacionin “Shigjeta” të Brigadës 128 të Ushtrisë Çlirimtare të Kosovës, të cilin e ka cilësuar si një ndër betejat më vendimtare kundër okupatorit serb.
“Trimëria dhe vendosmëria e luftëtarëve të kësaj brigade do të mbetet shembull i përjetshëm i guximit, sakrificës dhe dashurisë për atdheun”, theksoi Haradinaj.
Në përkujtimin e tij, ai ka sjellë në vëmendje edhe 26-vjetorin e masakrës mbi familjen Gërxhaliu, ku 13 anëtarë të një familjeje – përfshirë fëmijë, gra e pleq, u vranë mizorisht vetëm pse ishin shqiptarë.
“Selatini, i zoti i shtëpisë dhe njëherësh luftëtar i dalluar i Brigadës 142 ‘Mehë Uka’, ra atë ditë në përpjekje për të mbrojtur familjen e tij”, ka shkruar Haradinaj, duke shprehur nderim të veçantë për këtë akt trimëror e njerëzor.
Ai gjithashtu ka përmendur edhe emrat e luftëtarëve që ranë më 31 maj anekënd vendit: Asllan Hoti, Avni Buqaj, Bahti Buqaj, Beran Gashi, Ejup Bletaj, Ejup Kosumi, Gani Saramati, Safet Ajeti, Safet Peci, Salih Halilaj, Selver Maqkaj dhe Shpend Berisha, duke theksuar se kujtimi për ta do të mbetet i përjetshëm.
“Heroizmi dhe gjaku i tyre janë themelet mbi të cilat qëndron liria jonë”, përfundon Haradinaj.
