Rreth 250 milionë bletë kanë shpëtuar nga një kamion i përmbysur në shtetin amerikan të Uashingtonit, duke shkaktuar alarm nga autoritetet, të cilat i nxitën njerëzit të shmangin tufën e insekteve.
Ekipet e shpëtimit – raporton BBC – ndërhynë me ndihmën e disa bletarëve ekspertë pasi një kamion, që mbante më shumë se 31,000 kilogramë koshere aktive, u përmbys në një rrugë pranë kufirit kanadez.
“Qëllimi është të shpëtojmë sa më shumë bletë të jetë e mundur”, tha Zyra e Sherifit të Qarkut Whatcom (WCSO) menjëherë pas incidentit. Autoritetet thanë se vendi i rrëzimit do të mbetet i mbyllur “derisa të përfundojnë operacionet e shpëtimit”.
“250 milionë bletë tani janë të lira: SHMANGNI ZONËN për shkak të rrezikut të arratisjes dhe grumbullimit të bletëve në tufa”, shkroi Sherifi i Qarkut Whatcom. Bletarët kanë punuar me policinë “për të ndihmuar në zhvendosjen e koshereve në kuti”, enët që bletarët përdorin për të strehuar bletët e mjaltit. “Plani është që bletët të mund të rivendosin kosheren dhe të gjejnë mbretëreshën e tyre, gjë që duhet të ndodhë brenda 24 deri në 48 orëve të ardhshme.” Pamjet e ndara nga policia tregojnë një numër të madh bletësh që gumëzhijnë rreth kamionit të përmbysur.
Ndërsa disa bletarë përqendrohen vetëm në prodhimin e mjaltit, shumë të tjerë ua japin me qira kosheret e tyre fermerëve që kanë nevojë për insektet për të polenizuar të korrat e tyre.
