Një shtetas britanik është akuzuar për përpjekje për të kontrabanduar teknologji ushtarake amerikane në Kinë dhe për organizimin e përndjekjes dhe ngacmimit të kritikëve të autoriteteve kineze. John Miller, 63 vjeç, dhe shtetasi kinez Cui Guanghai u paditën të premten para jurive të mëdha federale në Milwaukee dhe Los Angeles, raporton Sky News.
Departamenti Amerikan i Drejtësisë tha se të dy u akuzuan për përndjekje ndërshtetërore, komplot për të kryer përndjekje ndërshtetërore, kontrabandë dhe shkelje të Aktit të Kontrollit të Eksportit të Armëve.
Zëvendës Prokurori i Përgjithshëm Todd Blanche tha: “Siç pretendohet, të pandehurit shënjestruan një banor të përhershëm të SHBA-së për ushtrimin e të drejtës së tij kushtetuese për lirinë e fjalës dhe u përfshinë në një komplot për të kontrabanduar teknologji të ndjeshme ushtarake amerikane në regjimin kinez. Ky është një sulm i paturpshëm ndaj sigurisë sonë kombëtare dhe vlerave tona demokratike.”
“Të pandehurit dyshohet se planifikuan të ngacmonin dhe frikësonin një individ që kritikoi veprimet e Kinës”, shtoi zëvendësdrejtori i FBI-së, Dan Bongino.
Sipas aktakuzës, dy të pandehurit vendosën një pajisje gjurmuese në makinën e viktimës dhe ia prenë gomat. Ata dyshohet se blenë dhe shkatërruan gjithashtu skulptura artistike të bëra nga viktima, të cilat përshkruanin Presidentin Kinez Xi Jinping dhe gruan e tij.
Të pandehurit Cui (43) dhe Miller dyshohet se u kanë paguar dy personave të tjerë rreth 36,500 dollarë për të bindur viktimën që të ndalonte së postuari foto të skulpturave të tij në internet, thuhet në aktakuzë. Nëse dënohen, Cui dhe Miller përballen me dënimet maksimale si në vijim: deri në pesë vjet burg për komplot, pesë vjet për përndjekje ndërshtetërore, 20 vjet për shkelje të Aktit të Kontrollit të Eksportit të Armëve dhe 10 vjet për kontrabandë.
Të dy ndodhen aktualisht në Serbi dhe autoritetet amerikane po bashkëpunojnë me zyrtarët serbë për ekstradimin e tyre. Një zëdhënës i Ministrisë së Jashtme Britanike tha: “Ne po i ofrojmë ndihmë konsullore një shtetasi britanik pas arrestimit të tij në Serbi në prill dhe jemi në kontakt me autoritetet lokale dhe familjen e tij.”
