Deputetja e PDK-së, Blerta Deliu Kodra, tha se nuk pret ndonjë epilog tjetër përpos zhvillimeve që janë parë edhe dy ditë më herët në Kuvend. Por, tha ajo, shpreson që Lëvizja Vetëvendosje të mendojë seriozisht për mënyrën se si ta nxjerrë Kuvendin nga bllokimi.
“PDK i ka propozuar alternativat e saj, kemi bërë përpjekje që nga përfundimi i zgjedhjeve që të dalim nga ngërçi politik. Natyrisht që ne si subjekt politik i kemi detyrat dhe obligimet tona. Sot do ta kemi një mbledhje të kryesisë e natyrisht që do të diskutojmë edhe për procesin e Zgjedhjeve Lokale, sepse Kosova së shpejti do të futet edhe në një fazë të zgjedhjeve lokale. Është e rëndësishme që si subjekt politik të dalim me kandidaturat e duhura sepse nuk e meriton Kosova këtë bllokim”, tha Deliu Kodra.
Deputetja e PDK-së tha se po e presin vendimin e kushtetueses, meqë ka tash një kërkesë të deponuar aty, e cila sipas saj, do të qartësojë gjithçka.
“Çfarëdo që të jetë vendimi i Kushtetueses do të jetë masë lehtësuese edhe për ne, por unë me shumë e shoh si një përpjekje për të mos thënë se nuk po votohet Haxhiu, por nuk po votohet komisioni”, tha ajo, derisa po hynte në sallën plenare në përpjekjen e 25 për konstituimin e Kuvendit.
