Kryetari i Nismës Socialdemokrate, Fatmir Limaj, ka thënë se është i gatshëm për të kontribuuar në ndërtimin e një marrëveshje politike që do të zhbllokonte situatën e krijuar dhe do të krijonte stabilitet. Ai ka përmendur sërish kushtin e tij për pozitën e Kryetarit të Kuvendit.
“Siç kam deklaruar edhe më parë publikisht, Nisma Socialdemokrate ka ofruar partneritet në kuadër të Kuvendit për të garantuar funksionalitet institucional. Ne kemi qenë dhe jemi të gatshëm për të kontribuar në ndërtimin e një marrëveshjeje politike që e zhbllokon situatën dhe garanton stabilitet. Qytetarët presin zgjidhje dhe qeverisje, jo krizë të përhershme. Kosova ka nevojë për institucione funksionale dhe lidership që merr përgjegjësi”, ka shkruar Limaj në Facebook.
Limaj ka zhvilluar një takim me përfaqësues të Institutit Demokratik të Kosovës (KDI) dhe organizatave të tjera të shoqërisë civile.
“Pajtohemi se bllokimi i institucioneve është i papranueshëm dhe çdo tentim për të shkuar në zgjedhje të reja për shkak të dështimit për të formuar institucionet është i dëmshëm për vendin. Kjo është një dukuri që e cënon të ardhmen politike dhe demokratike të shtetit tonë. Në këtë takim theksova se në emër të demokracisë nuk mund të justifikohet dëmtimi i interesit të vendit. Demokracia nuk nënkupton shkatërrim institucional, por zgjidhje politike përmes marrëveshjes”, ka shkruar Limaj në Facebook.
