Ministrja në detyrë e Ekonomisë së Kosovës, Artane Rizvanolli, ka deklaruar se funksionalizimi i Bursës Shqiptare të Energjisë Elektrike (ALPEX) përfaqëson një moment historik për sektorin energjetik në vend, duke e quajtur atë “një ëndërr të kahmotshme të realizuar për Kosovën”.
Në një postim publik në rrjetin social Facebook, ministrja në detyrë Rizvanolli njoftoi se Korporata Energjetike e Kosovës (KEK) ka siguruar energji elektrike për ndërmarrjet në tregun e lirë përmes ALPEX në ditën e parë të liberalizimit të tregut. Sipas saj, çmimi mesatar i energjisë së blerë për ditën e djeshme ishte 64.55 euro për MWh, ndërsa për sot është kontraktuar me çmim 86.75 euro për MWh – të dyja çmime të konsideruara konkurruese.
“Përtej frikës së sinqertë nga pasiguria që sjell liberalizimi në afat të shkurtër, e përtej klithmave të pasinqerta të disave, është me rëndësi të kuptojmë rëndësinë e kësaj ngjarjeje”, ka thënë Rizvanolli.
Sipas saj, ALPEX përfaqëson një mekanizëm për bashkimin e tregut energjetik mes Kosovës dhe Shqipërisë dhe ofron një sistem të funksionimit që respekton standardet më të larta evropiane të transparencës dhe llogaridhënies.
“ALPEX është vetë antidoti i ‘mafisë energjetike’ që ka funksionuar për dekada në rajon, por që nuk ka të bëjë aspak me Qeverinë Kurti,” ka theksuar ministrja.
Ajo shtoi se pavarësisht se ALPEX u themelua më 1 shkurt 2024, rëndësia e tij është lënë në hije nga zhvillimet e përditshme në diskursin publik.
Duke folur për konkurrencën në tregun e energjisë, Rizvanolli kujtoi se në vitin 2016 ekzistonte vetëm një furnizues – KESCO – ndërsa sot janë 21 të licencuar nga ZRrE, prej të cilëve së paku pesë janë aktivë dhe të gatshëm të ofrojnë energji për 1300 konsumatorë që tashmë janë pjesë e tregut të lirë.
