Bisedime të reja të drejtpërdrejta midis Rusisë dhe Ukrainës u zhvilluan sot në STAMBOLL, një ditë pas sulmit historik ukrainas ndaj aviacionit strategjik rus. Bisedimet u zhvilluan një ditë pas sulmit historik ukrainas ndaj aviacionit strategjik rus në të gjithë Rusinë dhe zgjatën pak më shumë se një orë.
Përfaqësuesit rusë dhe ukrainas u takuan të hënën në Stamboll për raundin e dytë të negociatave të drejtpërdrejta, por pa përparim të madh drejt përfundimit të luftës. Takimi zgjati mezi një orë dhe u ra dakord vetëm për zgjatjen e shkëmbimit të të burgosurve të luftës dhe kthimin e trupave të 12,000 ushtarëve të rënë.
Rusia paraqiti kushte gjatë takimit që konfirmojnë refuzimin e saj për kompromis. Sipas tekstit të memorandumit të publikuar nga media shtetërore ruse, Moska kërkon që marrëveshja të përfshijë njohjen ndërkombëtare të Krimesë dhe katër rajoneve të tjera ukrainase si pjesë të Rusisë, tërheqjen e forcave ukrainase, ndalimin e anëtarësimit të Ukrainës në NATO dhe njohjen e rusishtes si gjuhë zyrtare.
Dokumenti ofron dy mundësi, të dyja të papranueshme për Kievin. Mundësia e parë kërkon një tërheqje të plotë ushtarake të Ukrainës nga rajonet Luhansk, Donetsk, Zaporozhye dhe Kherson. Mundësia e dytë kërkon që Ukraina të ndërpresë të gjitha dislokimet ushtarake dhe të bjerë dakord të ngrijë ndihmën ushtarake të huaj, duke përfshirë komunikimet satelitore dhe inteligjencën. Ata gjithashtu kërkojnë heqjen e ligjit ushtarak dhe mbajtjen e zgjedhjeve presidenciale dhe parlamentare brenda 100 ditëve.
Ministri ukrainas i Mbrojtjes, Rustem Umerov, i cili udhëhoqi delegacionin ukrainas, tha se Kievit do t’i duhej një javë për të studiuar memorandumin rus dhe për të vendosur se si të përgjigjet. Ai shtoi se Ukraina propozoi vazhdimin e negociatave midis 20 dhe 30 qershorit, por theksoi se Kievi beson se vetëm një takim i drejtpërdrejtë midis Volodymyr Zelensky dhe Vladimir Putin mund të zgjidhë çështjet kryesore të diskutueshme.
Umerov tha se “i vetmi përparim i vërtetë” u bë në marrëveshjen e shkëmbimit të të burgosurve. Delegacionet ranë dakord të shkëmbenin trupat e 6,000 ushtarëve të vdekur dhe të krijonin një komision për shkëmbimin e të plagosurve rëndë.
Zelensky deklaroi se Ukraina i dorëzoi Rusisë një listë me 400 fëmijë të rrëmbyer, por delegacioni rus pranoi të diskutonte kthimin e vetëm 10 prej tyre.
Nga pala ruse, kryenegociatori Vladimir Medinsky tha se Moska kishte propozuar në Stamboll një armëpushim të pjesshëm që do të zgjaste “dy deri në tre ditë” që do të zbatohej në pjesë të caktuara të vijës së frontit për të mbledhur trupat e ushtarëve të rënë. Propozimi erdhi pasi Ukraina njoftoi se Rusia kishte refuzuar ofertën e saj për një armëpushim pa kushte.
Presidenti turk, Recep Tayyip Erdoğan, shprehu shpresën se do të jetë në gjendje të mbledhë udhëheqësit rusë dhe ukrainas në një takim me Donald Trump. Shtëpia e Bardhë tha se Trump ishte “i hapur” për ftesën e Erdoganit, por se ai “dëshiron që të dy udhëheqësit dhe të dyja palët të ulen së bashku në tryezë”.
Ka mbërritur reagimi i parë i Shtëpisë së Bardhë ndaj sulmit historik të djeshëm nga shërbimi i sigurisë ukrainase SBU ndaj katër bazave ajrore ruse.
