Një tërmet i fortë me magnitudë 5.8 ballë goditi zonën pranë Marmaris në provincën jugperëndimore turke të Muğla-s të martën në mbrëmje. Tërmeti u ndje në shumë pjesë të vendit dhe sipas informacionit zyrtar, 69 persona u plagosën, ndërsa një vajzë 14-vjeçare, Afranur Günlü, humbi jetën për shkak të panikut të shkaktuar nga dridhjet e tokës.
Sipas Autoritetit të Menaxhimit të Fatkeqësive dhe Emergjencave (AFAD), epiqendra e tërmetit ishte në Detin Mesdhe, 10.43 kilometra nga Marmaris, në një thellësi prej gati 68 kilometrash. Informacioni fillestar tregon se nuk ka dëme serioze në ndërtesat e banimit.
Ministri i Brendshëm Ali Yerlikaya konfirmoi se të gjitha ekipet e AFAD-it dhe departamenteve përkatëse ishin menjëherë në vendngjarje dhe se kërkimet dhe vlerësimet e sigurisë ishin duke u zhvilluar. “Fatkeqësisht, 14-vjeçarja Afranur Günlü pësoi një atak të rëndë paniku në Fethiye, u dërgua në spital, por pavarësisht përpjekjeve të mjekëve, ajo ndërroi jetë”, tha Yerlikaya.
68 të plagosur
Ai shtoi se shumë qytetarë u hodhën nga lartësitë në panik, duke shkaktuar lëndime të shumta. Katërmbëdhjetë persona u trajtuan në vend, tetë u liruan nga spitalet pas trajtimit, ndërsa 46 qytetarë ende po marrin trajtim në departamentet e urgjencës së spitalit.
Ministri i Mjedisit dhe Urbanizimit, Mehmet Özhaseki, u shprehu ngushëllime qytetarëve dhe tha: “Uroj shërim të shpejtë të gjithë të prekurve”.
Shërbimet kompetente vazhdojnë të monitorojnë situatën, dhe sizmologët paralajmërojnë se janë të mundshme lëkundje të mëtejshme.
