E ftuar në `RTK Prime` deputetja e Lëvizjes Vetëvendosje, Saranda Bogujevci, ka folur për siç ka thënë ajo `sulmet e fundit që i janë bërë në aspektin politik`, duke theksuar se në këto sulme po shfrytëzohet e kaluara dhe dhimbja e familjes së saj, viktima civile gjatë luftës.
Ajo ka thënë se “ka arritur në pikën që nuk ka të bëjë më me mua, por me çështjen e familjes sonë dhe atë që ka ndodhur gjatë luftës. Është mohuar plotësisht një pjesë e historisë sonë si viktima civile, ndërsa ata përpiqen të më sulmojnë në aspektin politik”.
Bogujevci ka shtuar se sfidat politike janë pjesë e betejave që mund të ndodhin, por kjo nuk do të thotë që dhimbja dhe historia personale duhet të përdoren si armë në këtë luftë. “Politikisht, mund të ketë dallime dhe beteja, sulmoni sa të doni, por nuk duhet të shfrytëzohet kjo pjesë e të kaluarës sonë,” ka thënë ajo.
Ajo ka përmendur edhe fatin e saj që pas luftës është evakuuar në Angli, ku ka gjetur mundësinë për rikuperim dhe përkrahje për betejën për drejtësi. “Unë jam viktimë e luftës, kjo është historia ime. Kam pasur një shtet tjetër mbrapa që më ka përkrahur mua dhe familjen time,” ka përfunduar ajo.
Bogujevci: Është zhvilluar një fushatë e orkestruar ndaj meje
Deputetja e Lëvizjes Vetëvendosje, Saranda Bogujevci, e ftuar në RTK Prime, ka folur lidhur me debatin me gazetarin Ilir Mirena, pas publikimit të një fotografie të Albin Kurtit gjatë përkujtimit të masakrës së familjes së saj. Ajo tha se fotografia është keqpërdorur dhe se ndaj saj është zhvilluar një fushatë e orkestruar nga disa gazetarë e analistë.
Ajo ka sqaruar se fotografia është realizuar gjatë përkujtimit të masakrës së familjes së saj, një ditë me peshë të madhe emocionale për të dhe familjen e saj. Në atë kohë, Kurti nuk ishte kryeministër, por kishte marrë pjesë në ceremoni si kryetar i Lëvizjes Vetëvendosje për të shprehur respektin e tij.
Sipas Bogujevcit, fotografia ka qarkulluar më parë në portale të ndryshme, por pas sqarimeve të saj kishte ndaluar së shpërndari dhe komentuar. Megjithatë, përdorimi i saj nga Ilir Mirena ka qenë i qëllimshëm dhe pa ndjeshmëri, duke mos marrë parasysh se bëhej fjalë për një moment të dhimbshëm personal.
“Reagimi im ka ardhur si rezultat i frustrimit, sepse nuk po respektohen kufijtë, sidomos nga gazetarë hulumtues që injorojnë ndjeshmërinë dhe sigurinë e asaj fotografie,” ka thënë ajo, duke shtuar se mënyra se si kjo çështje është trajtuar nga Mirena dhe disa analistë të tjerë e bën të besojë se bëhet fjalë për një fushatë të organizuar kundër saj.
Bogujevci paralajmëron padi: Kjo shkon përtej meje, është sulm ndaj të kaluarës sonë dhe viktimave
Deputetja e Kuvendit të Kosovës, Saranda Bogujevci, ka deklaruar se sulmet publike nuk kanë të bëjnë vetëm me të, por me gjithë të kaluarën e dhimbshme të vendit dhe viktimat e luftës.
Në përballje me analistë, Bogujevci ka thënë se kjo nuk është hera e parë që një grup i caktuar individësh sulmon figura simbolike të Kosovës, përfshirë edhe familjen Jashari.
“Fatkeqësisht, grupet e njëjta e kanë sulmuar familjen Jashari shumë kohë më parë. Nëse e kujtojmë aferën ‘Pronto’, kanë dalë incizimet se çfarë është folur për familjen Jashari. Pra, as ata nuk janë kursyer,” ka deklaruar ajo.
Bogujevci ka theksuar se nuk do të qëndrojë e heshtur përballë këtyre sulmeve dhe po shqyrton të gjitha mënyrat e mundshme ligjore, përfshirë edhe ngritjen e padive.
“Ajo që është me rëndësi për mua është sa do të jemi të heshtur përballë një grupi njerëzish, siç janë këta, që vazhdojnë me të njëjtin diskurs. Jam duke e shqyrtuar çdo mundësi – për padi dhe për procese të tjera – sepse kjo shkon përtej meje, nuk ka të bëjë vetëm me mua. Kjo është sulm ndaj të kaluarës sonë dhe ndaj viktimave,” ka thënë ajo.
Ajo ka reaguar ndaj një deklarate të cituar nga kritikët, që ka të bëjë me familjen e saj, duke thënë:
“Imagjinoni, thonë: ‘Familja Bogujevci nuk ka bërë asgjë, ata nuk kanë luftuar, ata vetëm i kanë vrarë.’ Imagjino si ndihen familjet e tjera që kanë pasur fatin e njëjtë.”
Deputetja ka përmendur gjithashtu se sulmet e fundit janë të motivuara nga qëndrimet e saj të guximshme në çështje të caktuara dhe vijnë nga individë që mobilizohen për të sulmuar në formën më të ulët të mundshme, sapo ndihen të sfiduar.
“Imagjino çdo gjë që kanë përdorë këto ditë që të gjitha kanë qenë publike më shumë se një dekadë, si çështja e ekspozitës, çështja e reparacioneve, e çështja tjetër,” ka thënë ajo.
