Përfaqësuesja e Lëvizjes Vetëvendosje, Albulena Haxhiu, pas takimit që patën me presidenten e shtetit, Vjosa Osmani për konsulta rreth datës së zgjedhjeve lokale, ajo tha se datat që u përmendën më së shumti ishin 5 tetori, 12 e 19 tetori.
Por, ajo tha se për Lëvizjen Vetëvendosje sa më shpejt që të mbahen zgjedhjet është aq më mirë, meqë sipas saj, duhet pasur parasysh edhe balotazhin e motin e ftohtë.
“Sapo përfundoi takimi i thirrur nga presidentja Osmani që kishte për qëllim konsultimin me partitë politike për caktimin e datës së zgjedhjeve lokale. Në këtë takim në vend të kryetarit, Albin Kurti isha si përfaqësuese e LVV-së. Sa i përket Lëvizjes Vetëvendosje ne paraqitëm qëndrimin tonë që është jashtëzakonisht me rëndësi që zgjedhjet lokale të mbahen sa më shpejt aq më mirë. Nëse zgjedhjet shpallen nesër, është mundësi edhe data 5 tetor, por po ashtu edhe data 12 apo data 19 tetor. Këto ishin datat që u përmendën më së shumti. Shumica e kryetarëve të partive politike ishin për 12 apo 19 tetor, ndonëse qëndrimin e paraqesin ata vetë. Por, sa i përket qëndrimit të LVV-së ishte që sa më herët që shpallen aq më mirë, duke pasur parasysh se mund të kemi edhe balotazh edhe duke pasur në vëmendje motin e ftohtë”, tha para gazetarëve Haxhiu pas përfundimit të takimit konsultativ me presidenten Osmani.
