Deputetja e AAK-së, Time Kadrijaj tha se në konsultat që patën me kryesuesin Dehari për caktimin e vazhdimit të seancës as PDK-ja, as LDK-ja e as AAK-ja nuk ishin të pajtimit dhe ishin të gatshëm që të dilnin edhe në ditën e Bajramit, por sipas saj vendimi ishte i kryesuesit.
“Ne si deputetë të opozitës nuk kemi pranuar ta ndryshomë me marrëveshje. Është e drejtë e kryesuesit që brenda 48 orësh të caktojë seancën. Ne do të kishim ardhur edhe ditën e Bajramit, por ka shfrytëzuar kryesuesi të drejtën e tij. Ne nuk kemi rënë dakord, as PDK as LDK as AAK, por ka qenë dëshirë e LVV-së dhe kryesuesit të seancës. Kishte kërkesë që të shtyhet për të shtunën, ne nuk e pranuam meqë e thotë qartë kushtetuta që më së largu pas 48 orësh duhet të thirret vazhdimi”, tha Kadrijaj.
Ajo tha se arsyeja pse nuk po votojnë është e qartë, meqë thotë se kalimi nga votimi i hapur në të fshehtë përbën shkelje kushtetuese.
“Deputetët kanë mandat, e kemi marr nga populli e jemi të partive të ndryshme. E drejtë e deputetit është të zgjedhë nëse do të votojë, për kundër, apo të abstenojë, arsyeja pse ne nuk po votojmë është e qartë, ka shkelje të kushtetutës. Kalimi i votimit nga i hapur në të mbyllur është antikushtetues dhe nuk dëshirojmë të bëhen lojëra të shkelet kushtetuta. Është partia që më së shumti ka shkelur kushtetutën”, tha ajo.
