Kryetari i komunës së Gjilanit, Alban Hyseni, ka mirëpritur vendimin e qeverisë në detyrë për ndërtimin e qarkores së jashtme të qytetit të Gjilanit dhe lidhjen e rrugës nacionale deri te autoudha Velekincë – Livoç i Ulët dhe i Epërm.
Në mbledhjen e sotme të Qeverisë në detyrë të Kosovës është shqyrtuar e miratuar propozim-vendimi preliminar për shpronësim të interesit publik të pronave të paluajtshme të pronarëve dhe zotëruesve të interesit, të cilët preken nga realizimi i projektit: Ndërtimi i qarkores së jashtme të qytetit të Gjilanit dhe lidhja e rrugës nacionale M25. II dhe M25. III deri te autoudha R7.1 (Velekincë – Livoçi i Ulët dhe i Epërm).
Në njoftimin e komunës bëhet me dije se i pari i Gjilanit ka theksuar se është nënshkruar Memorandumi i Mirëkuptimit për ndërtimin e qarkores së jashtme të qytetit të Gjilanit dhe tash po vazhdohet edhe me procesin e shpronësimit të pronave të paluajtshme të prekura nga projekti.
“Për dallim nga e kaluara, ku rrugët janë ndërtuar pa shpronësim dhe pa respektuar të gjitha procedurat, tani po i bëjmë punët me rend e në mënyrë ligjore: njëherë shpronësimi i pronave dhe pastaj fillimi i punimeve. Kjo është mënyra e duhur për të garantuar drejtësi dhe zhvillim të qëndrueshëm për qytetin tonë”, tha ai, thuhet në njoftim.
Hyseni falënderoi ministrin në detyrë të Mjedisit, Liburn Aliun dhe kryeministrin në detyrë të Kosovës, Albin Kurti, për mbështetjen e vazhdueshme.
