Derisa takimi i një dite më parë te presidentja e vendit nuk solli ende një datë për zgjedhjet lokale, megjithatë partitë politike po vazhdojnë t’i deklarojnë emrat me të cilët do të garojnë në këtë proces zgjedhor të vjeshtës.
Lëvizja Vetëvendosje e ka nominuar deputetin, Halil Thaçi si kandidat për kryetar të komunës së Obiliqit.
Kjo u bë e ditur nga Vetëvendosje ku kanë treguar se i pranishëm aty ishte edhe lideri i partisë,Albin Kurti.
“Me unanimitet të plotë, konfirmuan mbështetjen dhe njëherazi vendosën për nominimin e deputetit aktual Halil Thaçi si kandidat për kryetar të komunës së Obiliqit. Qytetarët e Obiliqit kanë votuar me mendje e me zemër për ndryshimin krejt dhe drejt e për vazhdimin e mirëqeverisjes cep më cep. Këtë herë, në Obiliq erdhi dita, me vendosmëri e me bindje të plotë, që të fitojmë edhe në zgjedhjet komunale”, thuhet ndër të tjera në njoftimin e shpërndarë nga kjo parti.
