Deputeti i Partisë Demokratike të Kosovës, Abelard Tahiri tha se Lëvizja Vetëvendosje po e delegjitimon e po e dëmton emrin e Albulena Haxhiut.
“Ne i kemi ofruar bashkëpunim për të konstituuar Kuvendin me ndonjë prej emrave të tjerë, por me gjasë duke mos i pasur numrat për ta bërë qeverinë atëherë kanë vendosur që si barrikadë ta vendosin një grua që mendojmë se çdo ditë e më shumë po e delegjitimojnë e po e dëmtojnë edhe më shumë reputacionin e saj, sepse mendoj që është sjellje e tyre e papranueshme edhe në raport me votuesit e tyre që të barrikadohen në këtë formë’, tha ai.
I pyetur nëse mund të mbahen dy palë zgjedhje në të njëjtën kohë ai tha se kjo do të ishte vetëm në favor të politikës, por jo të qytetarëve.
“Këto duhet me qenë të ndara, nëse duam të shkojmë në favorin e politikës mund t’i bëjmë bashkë, por nëse duam për të mirën e qytetarëve jo. Nëse duhet të shkohet në zgjedhje pse duhet të pritet mesi i tetorit, atëherë duhet të shkojmë më herët. Kosovës i duhen zgjedhje për qytetarë e jo zgjedhje për politikën”, tha Tahiri.
