Hetimi u drejtua nga autoritetet spanjolle, dhe në të morën pjesë agjencitë e zbatimit të ligjit nga Portugalia, Kolumbia, Britania e Madhe dhe Shtetet e Bashkuara.
Sipas Europolit, u sekuestruan 3.8 ton kokainë, 69 automjete, përfshirë 19 barka dhe motoskafe, si dhe gjashtë prona dhe 100,000 euro në para të gatshme.
Pas muajsh hetimesh, autoritetet arrestuan rreth 48 anëtarë të rrjetit kriminal më 3 qershor.
Rrjeti kontrabandonte kokainë nga Amerika e Jugut në Bashkimin Evropian duke përdorur një infrastrukturë detare të sofistikuar.
Banda zotëronte 11 motoskafe që u përdorën disa herë, duke u nisur nga pikat strategjike në Oqeanin Atlantik drejt anijes mëmë që transportonte kokainën. Pasi ngarkonin drogën në motoskafe, të dyshuarit i linin ato në Ishujt Kanarie, gati për shpërndarje.
Për më tepër, rrjeti kriminal përdorte një sistem kompleks komunikimi të koduar për t’iu shmangur zbatimit të ligjit, duke përfshirë përdorimin e terminaleve satelitore, telefonave të vështirë për t’u gjurmuar dhe gjuhës së koduar.
