Ndeshja mes Shqipërisë dhe Serbisë është mbyllur me rezultat të barabartë 0-0, pas nëntëdhjetë minutave të një loje të kujdesshme dhe me pak raste reale para porte.
Kuqezinjtë kanë pasur një iniciativë të lehtë në pjesën më të madhe të takimit, por pa arritur ta gjejnë rrjetën.
Rasti më i mirë për Shqipërinë ka qenë në fund të pjesës së parë, kur Rey Manaj e ka pasur mundësinë të shënojë nga pika e bardhë. Penalltia është fituar pas një pengese ndaj Elseid Hysajt brenda zonës, por Manaj nuk është treguar i saktë dhe gjuajtja e tij është ndalur nga portieri serb.
Pjesa e dytë ka nisur me një tjetër mundësi për Shqipërinë, këtë herë me Armando Brojën, i cili pas një depërtimi premtues nuk ka arritur të finalizojë.
Nga ana tjetër, Serbia ka pasur rast pas një goditje nga Samardzic, e cila ka shkuar pranë shtyllës.
Në minutën e shtatëdhjetë e një, Nedim Bajrami ka provuar portën pas një aksioni të kombinuar me Mirlind Dakun, por goditja e tij ka qenë e dobët dhe nuk e ka shqetësuar portierin kundërshtar.
Gjatë pjesës së parë, Vlahovic është ndalur nga Gjimshiti në një ndërhyrje që i ka kushtuar kapitenit shqiptar një karton të verdhë. Shqipëria ka pasur pati disa tentativa edhe me Mitajn, Lacin dhe Manajn, por asnjë prej tyre nuk është konkretizuar në gol.
Barazimi pa gola i lë të hapura llogaritë për fazën në vazhdim, në një grup ku kryeson Anglia, e cila gjatë ditës ka fituar në ndeshje me Andorën. Po këtyre katër skuadrave në Grupin K bën pjesë edhe Letonia.
Shqipëri–Serbi, pjesa e parë mbyllet pa gola, Manaj humb penalltinë
Pjesa e parë e ndeshjes ndërmjet Shqipërisë dhe Serbisë është mbyllur pa gola, ndonëse kuqezinjtë kanë pasur një mundësi të artë për të kaluar në epërsi.
Rey Manaj e ka humbur një penallti në minutat e fundit të kësaj pjese, duke mos arritur ta konkretizojë rastin më të mirë të dyzet e pesë minutave të para.
Penalltia është akorduar në favor të Shqipërisë pasi Elseid Hysaj është penguar brenda zonës nga mbrojtja serbe. Manaj e ka marrë përgjegjësinë për ta ekzekutuar, por goditja e tij është ndalur nga portieri i Serbisë.
Pjesa e parë është karakterizuar nga kujdesi i të dyja skuadrave, me topin që ka qarkulluar më shumë në mesfushë dhe me pak raste të rrezikshme.
Nis ndeshja – Shqipëri – Serbi
Ka filluar ndeshja Shqipëri – Serbi, e vlefshme për kualifikimet e Botërorit të vitit 2026.
Ndeshja zhvillohet në kuadër të Grupit K, ku janë edhe Anglia, Letonia dhe Andora.
Takimi zhvillohet në “Air Albania Stadium”. 
Shqipëri – Serbi, formacionet
Shqipëria dhe Serbia ndeshen sonte në një përballje në kuadër të kualifikimeve për Botërorin e vitit 2026. Tashmë janë publikuar edhe formacionet zyrtare.
SHQIPËRIA:
1. Strakosha, 3. Mitaj, 6. Gjimshiti, 5. Ajeti, 4. Hysaj, 16. Shehu, 21. Hoxha, 14. Laçi, 8. Asllani, 22. Broja, 7. Manaj.
SERBIA:
1. Petrovic, 3. Pavlovic, 4. Milenkovic, 16. Erakovic, 7. Terzic, 10. Lukic, 5. Maksimovic, 14. Zivkovic, 11. Samardzic, 23. Vlahovic, 9. Mitrovic.
