Ministri i Mbrojtjes së Shqipërisë, Pirro Vengu, zhvilloi të dielën një vizitë në rajonin stërvitor të Bizës, me rastin e përmbylljes së stërvitjes shumëkombëshe “Defender 2025”.
Kjo vizitë shënon një moment të rëndësishëm, duke theksuar angazhimin e lartë dhe bashkëpunimin ndërkombëtar të Forcave të Armatosura Shqiptare.
Ministri Vengu u shoqërua nga drejtues të lartë të Forcave të Armatosura, përfshirë Shefin e Shtabit të Përgjithshëm, gjenerallejtënant Arben Kingji, Komandantin e Forcës Tokësore, gjeneralmajor Ilir Xhebexhia, Komandantin e Forcës Ajrore, gjeneralmajor Ferdinant Dimo, si dhe Drejtorin e Shtabit të Përgjithshëm, gjeneralbrigade Ardian Lilo.
Gjatë vizitës, ministri i Mbrojtjes dhe drejtuesit e tjerë ndoqën nga afër demonstrimet taktike dhe angazhimin e trupave të përqendruara në terren. Këto demonstrime ishin pjesë e fazës përmbyllëse të stërvitjes, duke treguar aftësitë operacionale dhe koordinimin mes forcave pjesëmarrëse.
Gjeneralbrigade Lilo informoi ministrin përmes një prezantimi gjithëpërfshirës mbi të gjitha aspektet e “Defender 25”. Prezantimi mbuloi fazën përgatitore, konferencat planifikuese, pjesëmarrjen ndërkombëtare, objektivat strategjike, kapacitetet e angazhuara, si dhe mësimet e nxjerra nga zhvillimi i stërvitjes.
Në përfundim, Ministri Vengu shprehu mirënjohjen dhe falënderimet e tij për të gjithë efektivët pjesëmarrës. Ai vlerësoi lart përkushtimin, profesionalizmin dhe nivelin e lartë të bashkëpunimit të treguar gjatë të gjitha fazave të stërvitjes. Kjo thekson rëndësinë e këtyre stërvitjeve për forcimin e kapaciteteve mbrojtëse dhe bashkëpunimin me partnerët ndërkombëtarë.
Përmbyllja e vizitës u shoqërua me një drekë të përbashkët, si shenjë respekti dhe mirënjohjeje ndaj efektivëve të angazhuar në këtë stërvitje madhore./atsh
