Deputeti i Lidhjes Demokratike të Kosovës, Arben Gashi, ka thënë se zgjedhjet janë mënyra më e drejtë, legjitime dhe paqësore për t’i dhënë fund ngërçit politik që ka kapluar vendin.
Në një postim në Facebook, Gashi ka thënë se është momenti për dalje nga kriza, e jo për monopole.
“Kosova sot ndodhet në një bllokadë politike që buron nga një pabarazi e thellë: Njëra palë ka monopolin e propozimit; Tjetra ka të drejtën legjitime të votës. Por nuk ka barazi. Nuk ka kompromis. Ka vetëm arrogancë”, ka theksuar Gashi.
Sipas tij, Lëvizja Vetëvendosje po dëshiron ta realizojë qëllimin e saj pa asnjë kompromis politik.
Ai ka thënë se shprehja e kryeministrit në detyrë “hajt, se këta dorëzohen…”, nuk është as strategji as vizion.
“Është përçmim. Dhe institucionet nuk mund të udhëhiqen me përçmim. Si përfaqësues i qytetarëve, unë nuk mund të hesht. Nuk jemi këtu për të nënshtruar njëri-tjetrin. Jemi këtu për t’i shërbyer Kosovës”, ka theksuar Gashi.
Ai ka thënë se zgjedhjet janë zgjidhja burimore në çdo demokraci.
“Dhe për ta nxjerrë vendin nga kjo krizë me përgjegjësi, integritet dhe vullnet të qartë për zgjidhje. Kur arroganca bëhet rregull – qytetari duhet të rikthehet si gjykatësi kryesor. O do të ketë zgjidhje me marrëveshje të drejtë, Ose le të flasë qytetari! Zgjedhjet janë zgjidhja burimore në çdo demokraci. Ato janë mënyra më e drejtë, më legjitime dhe më paqësore për t’i dhënë fund kësaj bllokade të dëmshme”, ka shkruar Gashi.
Të shtunën ishte dështimi i 28-të për konstituimin e legjislaturës së nëntë të Kuvendit të Kosovës. E të hënën do të jetë përpjekja e 29-të për konstituim të Kuvendit.
