Policia e Kosovës ka bërë të ditur se në mbrëmjen e së shtunës, në kuadër të planit operativ “Mbrojtja e Pyjeve 2025”, policia e Kaçanikut gjatë patrullimit në Malet e Sharrit, në rrugën për në Luboten, ka hasur një automjet tip xhip me rimorkio të ngarkuar me dru të prera ilegalisht.
“Pavarësisht sinjaleve të policisë për ndalim, personat e dyshuar kanë vazhduar lëvizjen, më pas në një rrugë malore kanë shkarkuar disa dru për të penguar policinë, i kanë vënë zjarrin automjetit xhip dhe janë larguar në drejtim të panjohur”, thuhet në njoftim.
Sipas njoftimit, në vendin e ngjarjes kanë dalë, komandanti i stacionit policor, një njësi e NJRSH dhe janë njoftuar edhe zyrtarët e Parkut Kombëtar “Sharri”.
“Janë ndërmarrë veprime hetimore dhe është në proces identifikimi i të dyshuarve”, thuhet në njoftim.
Policia Rajonale e Ferizajt thekson se në bashkëpunim me rojet e pyjeve po vazhdon angazhimet për parandalimin e prerjes dhe shitjes ilegale të druve.
