Garda Kombëtare e Kalifornisë ka mbërritur në Los Angeles, pasi u dërgua atje nga Presidenti i Shteteve të Bashkuara, Donald Trump, për dy ditë protestash nga qindra njerëz kundër bastisjeve të imigracionit të kryera si pjesë e politikave të ashpra të Trump. Në pamjet video të së dielës në mëngjes, një duzinë anëtarësh të Gardës Kombëtare rreshtohen përpara ndërtesës së qeverisë federale në qendër të Los Angeles, ku u morën të ndaluarit nga bastisjet e imigracionit të kryera të premten, të cilat çuan në protesta të shtunën.
Të dielën pasdite sipas kohës lokale, ndodhi një përleshje midis anëtarëve të Gardës Kombëtare dhe protestuesve.
Në të njëjtën kohë, Trump foli edhe për shtypin.
“Do të kemi trupa kudo, kudo që të jetë e nevojshme. Nuk do të lejojmë që kjo t’i ndodhë vendit tonë… Nëse shohim rrezik, do të përgjigjemi fuqishëm, shumë fuqishëm. Çdo gjë duhet t’i nënshtrohet ligjit dhe rendit. Jemi të gatshëm të dërgojmë këdo që është i nevojshëm për të siguruar që rendi të respektohet.”
“Ne do ta monitorojmë situatën – nëse ka pështymë mbi popullin tonë, nëse ka sulme mbi policinë ose ushtarët tanë, do të ketë një përgjigje. Ua thashë qartë: askush nuk do të pështyjë mbi policinë ose ushtrinë tonë pa u ndëshkuar. Nëse kjo ndodh, përgjigjja do të jetë shumë, shumë e fortë”, tha Trump, duke iu drejtuar gazetarëve. “Ata pështyjnë, ne godasim”, tha Trump.
Ai shtoi se qeveria do të bënte gjithçka që ishte e nevojshme për të rivendosur rendin: “Ne do të dërgojmë gjithçka që na nevojitet për të siguruar ligjin dhe rendin. Ne po monitoronim nga afër atë që po ndodhte në Los Angeles mbrëmë – pati shumë dhunë dhe mund të kishte qenë shumë më keq.”
Kur u pyet nëse e shihte mundësinë e përhapjes së protestave, Trump u përgjigj: “Do ta ndjekim nga afër”.
Në kontekstin e një konflikti me Guvernatorin e Kalifornisë, Gavin Newsom, lidhur me vendimin për të dërguar Gardën Kombëtare, Trump tha se i foli drejtpërdrejt: “I thashë, ‘Duhet ta zgjidhësh këtë, ose po dërgoj ushtrinë’ – dhe e bëmë.”
