Auditori i Përgjithshëm ka gjetur një sërë parregullsish në Komunën e Prishtinës gjatë vitit 2024.
Në draftin e raportit të siguruar nga RTK thuhet për menaxhim jo të mirëfilltë të kontratave publike dhe subvencioneve, pagesa për punë dhe shërbime pa procedura të prokurimit dhe raporte të pranimit, ndryshime në shuma buxhetore pa aprovimet e duhura, mangësi në procesin e vlerësimit të ofertave gjatë procedurave të prokurimit dhe aplikimin e drejtë të tyre.
Këtu përmenden edhe parregullësitë në menaxhimin e subvencionit për kopshtin publiko-privat “Botanika” me vlerë prej 58,820 eurove.
Ndonëse këto subvencione ishin paraparë për familjet me të ardhura më pak se 1 mijë euro, 7 prindër kishin vazhduar të paguajnë tarifën e plotë mujore të çerdhes, derisa 4 fëmijë që nuk kishin ndjekur fare kopshtin gjatë vitit 2024 ishin përfshirë në lista dhe kopshti kishte përfituar subvencione për ta.
Raporti i auditimit flet për manipulim të listave e raportim të pasaktë të ardhurave të prindërve përfitues. Ndërsa, thuhet se komisioni për verifikim atë kohë as nuk kishte qenë funksional.
Tutje, në raport thuhet se komuna në tri raste ka lidhur kontrata pa i përfillur procedurat adekuate të prokurimit.
Në dy raste, Komuna e Prishtinës kishte lëshuar leje ndërtimi, e tek pastaj i kishte nisur procedurat për prokurim dhe nënshkrim të kontratave.
Më datë 05.09.2024 Komuna e Prishtinës kishte hyrë në marrëveshje kontraktuale me UNDP-në për të realizuar disa projekte. E për to, komuna ishte dakorduar që në kundërvlerë të projektit t’i transferojë në formë parapagimi një vlerë të kostos prej 5,120,000 euro.
Sipas auditorit, kontraktimi dhe pagesat në formë të paradhënies janë në kundërshtim me Ligjin e Prokurimit dhe Ligjin e Buxhetit.
E kur flitet për kontrata milionëshe, komunarët thuhet se kanë dhënë nënshkrimet e tyre edhe në rastet kur operatorët ekonomik nuk i kanë plotësuar kriteret e nevojshme.
Auditori përmend mangësi në tri procedura të tenderimit, atë të projektimit të “Art & Technology Hub – Tulltorja”, kontratë me vlerë 1,200,000 euro, në dosjen e tenderit për projektin “Ndërtimi i rrugëve në lagjen Kodra e Trimave”, kontratë e nënshkruar në vlerë prej 598,764 euro, si dhe në dosjen e tenderit për projektin “Renovime për Qendra të ndryshme Sociale në lagjet Kodra e Trimave, Tophane, Qafa, Aktash, Pejton, Ulpiana”, kontratë e nënshkruar në vlerë të parashikuar prej 100,000 eurosh.
Raporti i auditorit ka rezultuar me 27 rekomandime, prej tyre 12 janë rekomandime të reja, 14 rekomandime të përsëritura dhe një rekomandim pjesërisht i përsëritur.
RTK ka kontaktuar zyrtarët e Komunës së Prishtinës rreth këtij raporti dhe është në pritje të përgjigjes nga ta.
