Me rastin e 26-vjetorit të nënshkrimit të Marrëveshjes së Kumanovës, kryetari i Aleancës për Ardhmërinë e Kosovës, Ramush Haradinaj, ka kujtuar kontributin e aleatëve ndërkombëtarë dhe luftën e drejtë të Ushtrisë Çlirimtare të Kosovës.
Në një postim në Facebook, Haradinaj tha se “lufta çlirimtare e UÇK-së, me pastërtinë dhe kauzën e saj të drejtë, fitoi përkrahjen e shteteve demokratike dhe të NATO-s, të prirë nga SHBA-ja”.
Ai theksoi se Marrëveshja e Kumanovës shënon fillimin e tërheqjes së forcave serbe nga Kosova, pas fushatës 78-ditëshe të bombardimeve të NATO-s.
“Dy mrekulli ndodhën gjatë atyre viteve: përkrahja e kombit shqiptar ndaj UÇK-së dhe mbështetja vendimtare nga NATO,” shkroi ai, duke shtuar se populli i Kosovës do të mbetet përjetësisht mirënjohës ndaj aleatëve dhe veçanërisht ndaj Shteteve të Bashkuara të Amerikës.
