Time Kadrijaj, deputete nga Aleanca për Ardhmërinë e Kosovës, tha së dështimi i zgjedhjes së kryeparlamentares është dështim i Albin Kurtit.
“Ishte hera e 29 që po tentohet të konstituohet Kuvendi dhe të zgjidhet kryeparlamentarja. Edhe pse parafolësja tha se ne po votojmë për procedurë dhe jo për zgjedhjen e kryeparlamentares, ne në fakt e kemi filluar me votimin e kryeparlamentares dhe tash po e shohim që po dështon zgjedhja e kryeparlamentares dhe po dështon Albin Kurti. Ne nuk po shohim që ka angazhim nga kjo qeveri për këtë ngërç politik që është formuar, nuk ka interes, sepse sot në sallë ishin kryeministri në detyrë dhe ishin ministrat, që do të thotë paradite janë deputetë, pasdite janë kryeministra dhe ministra, janë zëvendëskryeministra të cilët e kanë uzurpuar qeverinë e Kosovës dhe edhe Kuvendin e Kosovës, duke mos tentuar dhe duke mos e siguruar shumicën e thjeshtë për kalimin e kryeparlamentares së propozuar nga kjo qeveri”, tha Kadrijaj
Kadriaj tha se i vjen keq, edhe pse ka dhënë alternativa. “Jemi munduar që të zhbllokojmë këtë ngërç që është formuar në konstituimin e Kuvendit të Kosovës, nuk po mirëpritet nga kjo parti, sepse në rastet e kaluara, nëse do të kishte pasur raste të tilla, unë besoj se secila parti do ta kishte pranuar në mënyrë që të kalonte kryeparlamentari. Kryekëput është detyrë e kësaj qeverie që të sigurojë 61 vota në mënyrë që të kalojë kryeparlamentari. Në asnjë formë nuk e kanë për obligim partitë tjera një kryeparlamentar apo edhe një kryeministër në të ardhmen nëse nuk kanë një marrëveshje politike ose një koalicion politik. Ne po shpresojmë që Gjykata Kushtetuese të na ofrojë një alternativë që në të ardhmen mos të kemi probleme të tilla. Ne kemi ofruar alternativa dhe kemi thënë që do të votojmë kandidatin e Vetëvendosjes pa asnjë kusht, vetëm me qëllimin që të zgjidhim këtë ngërç”, tha deputetja e AAK-së.
