Në një ceremoni solemne, aktori i njohur Timo Flloko u nderua me titullin “Qytetar Nderi” i Komunës së Pejës për kontributin e tij të jashtëzakonshëm në fushën e artit shqiptar.
Kryetari i Komunës së Pejës, Gazmend Muhaxheri, dhe Kryesuesi i Kuvendit Komunal, Rexhep Kutrbogaj, i dorëzuan këtë titull Fllokos, duke theksuar ndikimin e tij të madh si aktor në skenën e artit shqiptarë, në role të mëdha në teatër dhe kinematografi, si regjisor veprash me vlerë dhe si poet, me ndikim, reprezentacion i Kosovës dhe Shqipërisë, në të gjitha skenat botërore, fitues i shumë titujve ndërkombëtar dhe i lindur në Pejë, njofton Komuna e Pejës.
Në fjalën e tij, Flloko shprehu mirënjohjen për këtë nder, duke theksuar se ndjehet i lidhur ngushtë me Pejën, qytetin ku ka kaluar fëmijërinë dhe ka marrë frymëzim për karrierën e tij artistike. Ai gjithashtu ka shkruar poezi për Pejën, duke e përjetësuar këtë qytet në veprat e tij.
