Britania dhe aleatë të tjerë vendosën sot sanksione ndaj dy ministrave izraelitë të ekstremit të djathtë, Itamar Ben-Gvir dhe Bezalel Smotrich, për “nxitje të përsëritura të dhunës kundër komuniteteve palestineze”, tha Ministria e Jashtme Britanike.
Kanadaja, Australia, Zelanda e Re dhe Norvegjia iu bashkuan Britanisë në ngrirjen e aseteve dhe vendosjen e ndalimeve të udhëtimit për Ministrin e Sigurisë Kombëtare të Izraelit, Ben-Gvir, një emigrant nga Bregu Perëndimor, dhe Ministrin e Financave, Smotrich.
Ministri i Jashtëm izraelit, Gideon Saar, tha se ky veprim ishte “skandaloz” dhe se qeveria do të mbajë një takim të posaçëm në fillim të javës së ardhshme për të vendosur se si t’i përgjigjet “vendimit të papranueshëm”.
Duke folur në përurimin e një vendbanimi të ri në kodrat Hebron, Smotrich shprehu “përbuzjen” e tij për veprimin britanik. Britania, ashtu si vendet e tjera evropiane, po rrit presionin mbi qeverinë e kryeministrit izraelit Benjamin Netanyahu për t’i dhënë fund bllokadës së ndihmës për Gazën, ku, sipas ekspertëve ndërkombëtarë, uria është e pashmangshme.
