Aktivistja suedeze Greta Thunberg është deportuar nga Izraeli, së bashku me një nga gjashtë aktivistët francezë që ishin pasagjerë në një anije me ndihma humanitare që lundroi drejt Rripit të Gazës derisa u arrestua nga autoritetet izraelite, njoftoi sot Ministri i Jashtëm francez Jean-Noel Barrot.
“Një nga bashkatdhetarët tanë nënshkroi një formular izraelit duke pranuar deportimin pa pritur vendimin e gjyqësorit. Kthimi i tij në Francë pritet sot. Pesë të tjerët refuzuan dhe deportimi i tyre i mundshëm do të bëhet pas vendimit të një gjyqtari izraelit në ditët në vijim”, tha ministri francez në margjinat e konferencës për mbrojtjen e oqeaneve në Nisë.
Ministri nuk e zbuloi identitetin e shtetasit francez që do të kthehet në vend të martën. Anija me vela Madleen, e cila u nis nga Siçilia më 1 qershor, mbante 12 persona, përfshirë aktivisten suedeze të klimës Greta Thunberg dhe eurodeputeten franceze Rima Hassan.
“Ata që refuzojnë të nënshkruajnë dokumentet do të dalin para një gjyqtari”
Thunberg dhe aktivistë të tjerë u dërguan në aeroportin e Tel Avivit përpara se të deportoheshin, tha ministria e jashtme e Izraelit. Anija u dërgua në portin izraelit të Ashdodit, raporton Reuters.
“Disa nga pasagjerët e ‘jahtit selfie’ pritet të largohen nga Izraeli në orët në vijim”, tha ministria.
“Ata që refuzojnë të nënshkruajnë dokumentet e deportimit dhe të largohen nga vendi do të çohen para një gjykatësi, në përputhje me ligjin izraelit, për të miratuar deportimin e tyre”, tha ai.
Aktivistët u vizituan në aeroport nga përfaqësues diplomatikë të vendeve të tyre, shtoi ministria izraelite.
Më vonë njoftoi se ishte duke shkuar në Francë me Greta Thunberg.
U përpoqën të transportonin ushqim në Gaza
Qëllimi i Madleen ishte t’u sillte ndihmë humanitare palestinezëve dhe të thyente bllokadën izraelite të atij territori palestinez, i cili, sipas Kombeve të Bashkuara, kërcënohet nga uria.
Ishte përpjekja e dytë nga organizata Freedom Fleet për të dërguar anijen e saj në Gaza. Në fillim të majit, anija Conscience ndaloi udhëtimin e saj drejt enklavës pasi u godit nga dy dronë pranë ujërave territoriale malteze, raportoi Reuters.
Madleen u përpoq të transportonte lëngje frutash, qumësht, oriz, produkte të konservuara dhe çokollata proteinash në Gaza, donacione nga qindra qytetarë të qytetit sicilian të Katanias, tha më parë gazetarja Andrea Legni, një pasagjere në anije.
