Aktivistja suedeze Greta Thunberg u kthye në Stokholm gjatë natës, pasi u deportua nga Izraeli dje dhe ndaloi në Paris.
22-vjeçarja ishte në bordin e një anijeje të OJQ-së Freedom Flotilla që po shkonte drejt Gazës kur u ndalua në ujërat ndërkombëtare dhe u dërgua në Izrael nga ushtria, së bashku me shoqëruesit e saj.
“Thashë se doja të largohesha nga vendi sa më shpejt të ishte e mundur. Por thashë gjithashtu se na sollën atje ilegalisht kundër vullnetit tonë”, tha Thunberg pas mbërritjes në aeroportin e Stokholmit.
“Jam shumë e shqetësuar për zhvillimet e ardhshme, për shkeljet e së drejtës ndërkombëtare dhe për krimet e luftës për të cilat është përgjegjës Izraeli”, shtoi Thunberg, e cituar nga agjencia suedeze e lajmeve TT. E pyetur nëse kishte frikë kur në anije hipi milicia izraelite, ajo u përgjigj: “Ajo nga e cila kam frikë është se njerëzit do të heshtin ndërsa po ndodh gjenocidi”.
Greta Thunberg dhe tre të tjerë në bordin e anijes kanë nënshkruar një dokument për deportim vullnetar, pjesa tjetër janë ende në Izrael, duke pritur vendimin e gjyqtarit për këtë çështje. “Jam shumë e shqetësuar për ta”, shtoi aktivistja.
