Gjatë kontrollit të shtëpisë së burrit që vrau dhjetë persona në ish-shkollën e tij në Graz dhe më pas kreu vetëvrasje, ekipet hetimore gjetën një letër lamtumire dhe një bombë tubi jofunksionale, njoftoi sot policia lokale.
Viktimat e tragjedisë po nderohen sot me një minutë heshtje, dhe besohet se sulmi i djeshëm në gjimnazin në Graz ishte më vdekjeprurësi në Austri pas Luftës së Dytë Botërore.
Sulmuesi, një 21-vjeçar, jetonte në afërsi të Gracit dhe ishte ish-nxënës i shkollës ku kreu vrasjen masive, por nuk e mbaroi kurrë atë shkollë.
Policia tha se sulmuesi përdori dy lloje armësh, një pushkë gjahu dhe një pistoletë, të cilat ata pretendojnë se i zotëronte ligjërisht.
Drejtori i sigurisë publike në Ministrinë e Brendshme të Austrisë, Franz Ruff, i tha televizionit “ORF” se nuk dihet nëse sulmuesi i ka sulmuar viktimat në mënyrë të synuar apo të rastësishme, dhe se kjo është ende duke u hetuar.
Ai shtoi se të plagosur u gjetën në disa vende në shkollë, dhe një ishte përpara ndërtesës së shkollës.
