Ministria e Punëve të Jashtme dhe Diasporës ka shprehur shqetësim të thellë për rritjen e rasteve të ndalimeve dhe arrestimeve arbitrare të qytetarëve të Republikës së Kosovës nga autoritetet e Serbisë.
MPJD u bën thirrje të gjithë qytetarëve, përfshirë ata nga mërgata që planifikojnë të udhëtojnë drejt Kosovës, që të shmangin kalimin përmes kufirit me Serbinë dhe të përdorin pika të tjera kufitare.
“Rasti i fundit i ndalimit të ish-punonjësit të Policisë së Kosovës, z. Spahiu, në kufirin Serbi–Hungari, shihet si dëshmi e praktikave të papranueshme të autoriteteve serbe, që bien ndesh me të drejtën ndërkombëtare dhe të drejtat e njeriut”, thuhet nga MPJD.
MPJD po ndjek situatën nga afër dhe është në kontakt të vazhdueshëm me institucionet përkatëse dhe partnerët ndërkombëtarë, për të garantuar sigurinë dhe të drejtat e qytetarëve të Kosovës.
