Me rastin e Ditës së Çlirimit të Kosovës, Bekim Jashari ka përcjellë një mesazh për reflektim dhe nderim të sakrificës së brezave të tërë që kontribuuan për lirinë e vendit.
“12 qershori shënon jo vetëm fundin e një pushtimi të gjatë dhe të dhunshëm, por edhe kurorëzimin e përpjekjeve tona shekullore për të jetuar të lirë në tokën tonë, me dinjitet dhe pa frikë,” u shpreh Jashari. Ai rikujtoi rrugën e gjatë të popullit shqiptar, nga përndjekja e mësuesve për mësim në gjuhën shqipe, organizimet ilegale, protestat studentore, deri te themelimi i Ushtrisë Çlirimtare të Kosovës nën udhëheqjen e komandantit legjendar, Adem Jashari.
Jashari theksoi vuajtjet që ka kaluar populli i Kosovës: dëbimet, torturat, dhunimet, vrasjet, djegiet për së gjalli dhe zhdukjet pa gjurmë. Por, sipas tij, në mesin e kësaj errësire, lindën sakrificat më të pastra për liri.
Ai vlerësoi edhe rolin vendimtar të mërgatës shqiptare dhe mbështetjen ndërkombëtare, që kulmoi me ndërhyrjen e NATO-s për të ndaluar gjenocidin dhe për të mundësuar çlirimin e vendit.
“Sot, 26 vjet më pas, Kosova është e lirë, e ndërtuar mbi gjakun e të rënëve, mbi plagët e të mbijetuarve dhe mbi besimin se ky vend e meriton të jetë i barabartë mes kombeve tjera,” tha Jashari, duke shtuar se detyra jonë sot është ta nderojmë këtë liri përmes ndërtimit të një shteti të drejtë dhe të ndershëm.
Në fund, Bekim Jashari përsëriti thirrjen për bashkim e unitet, duke theksuar se “Kosova nuk është thjeshtë një vend, ajo është amaneti i gjakut të dëshmorëve, i sakrificës së brezave, i lotit të nënave dhe i qëndresës së një populli që nuk u përkul kurrë”, tha Jashari.
