Udhëheqësi i Iranit, Ajatollah Seyyed Ali Khamenei, ka emëruar komandantë të rinj ushtarakë pas sulmeve ajrore izraelite në orët e para të mëngjesit të së premtes që rezultuan në vrasjen e disa oficerëve të lartë iranianë.
Pas vdekjes së Gjeneralit Mohamed Hussein Baqeri, Khamenei emëroi Gjeneralin Seyyed Abdolrahim Mousavi si Shefin e ri të Shtabit të Përgjithshëm të Forcave të Armatosura të Iranit.Gjenerali Mohammad Pakpour është emëruar në krye të Korpusit të Gardës Revolucionare Iraniane (IRGC), duke pasuar gjeneralin Hossein Salami, i cili u vra gjithashtu në sulme që Teherani i përshkruan si “akte terroriste nga regjimi sionist”.
“Sulmi kriminal ndaj Teheranit dhe qyteteve të tjera iraniane nuk do të mbetet pa përgjigje. Ky regjim sionist duhet të presë ndëshkim të rëndë. Me hir të Zotit, dora e fuqishme e Forcave të Armatosura të Republikës Islamike nuk do t’i lërë ata të pandëshkuar”, tha Khamenei.
Sipas burimeve iraniane, objektivat e sulmeve izraelite ishin qendrat e larta ushtarake dhe të sigurisë në Teheran dhe disa qytete të tjera. Autoritetet iraniane njoftuan një “përgjigje vendimtare dhe të fortë” në ditët në vijim.
