Kryepeshkopi i Kishës Ortodokse Autoqefale të Kosovës Nikolle Xhufka gjatë ditëve të fundit, së bashku me klerin dhe stafin e Kishës Ortodokse Autoqefale të Kosovës, realizuan një vizitë zyrtare në disa manastire në Greqi. Sipas Kishes Autoqefale te Kosoves qëllimi i kesaj vizite ishte i qartë dhe paqësor: Ata kërkonin njohjen shpirtërore dhe bashkimin kishtar nga vëllezërit tanë ortodoksë për Kishën tonë në Kosovë.”Lavdi Zotit, disa prej këtyre institucioneve na pritën me dashuri të madhe dhe dhanë bekimin e tyre për besimtarët ortodoksë të Kosovës (Dardanisë), duke afirmuar të drejtën tonë për autoqefali dhe liri shpirtërore”, shkruan Xhufka. Por ai tha se një incident tepër i turpshëm dhe i rrezikshëm ndodhi gjatë kësaj vizite. “Jashtë manastirit ku po qëndroja, një automjet me targa ushtarake serbe (BG2707AV) qëndronte i parkuar duke më fotografuar dhe mbikëqyrur. Pasi e dokumentuam, verifikuam zyrtarisht se automjeti është i regjistruar në emër të Ministrisë së Mbrojtjes së Republikës së Serbisë.
Ky veprim është i papranueshëm, i rrezikshëm dhe një akt i pastër provokimi e frikësimi.
Me çfarë të drejte ligjore shteti serb përndjek dhe rrezikon jetën time private në një vend të tretë?!”, shkruan ai. Kryepeshkopi Xhufka beri thirrje publike institucioneve të Republikës së Kosovës, Ambasadës së Shteteve të Bashkuara, si dhe të gjitha institucioneve përkatëse vendore dhe ndërkombëtare, që të ndërhyjnë menjëherë dhe seriozisht.
“Unë ndihem i përndjekur, i kërcënuar dhe i vënë në shënjestër. Kjo është një shkelje flagrante e sigurisë dhe e dinjitetit njerëzor.
Dua të jetë e qartë: ne si popull dhe si besimtarë nuk do të nënshtrohemi përballë frikës dhe kërcënimeve.
Ecim me paqe, por nuk gjunjëzohemi kurrë përballë padrejtësive.
Bashkëngjitur gjeni provën e qartë të automjetit në fjalë.
I ftoj të gjithë qytetarët dhe faktorin ndërkombëtar që të jenë vigjilentë dhe të kërkojnë drejtësi”, shkruan kryepeshkopi Xhufka.
