Mijëra njerëz dolën në rrugë të dielën në protesta të koordinuara në Spanjë , Itali dhe Portugali kundër turizmit masiv, duke kërkuar një ripërcaktim të një modeli ekonomik që ata thonë se po rrit çmimet e banesave dhe po ndryshon frymën e qyteteve të tyre të lindjes.
Njerëzit dolën në rrugët e disa prej destinacioneve turistike më të njohura në Evropën Jugore – të tilla si Barcelona, Palma de Mallorca, Venecia, Lisbona.
Disa prej tyre përdorën pistoleta uji kundër grupeve të turistëve.
“Ideja e pistoletave me ujë është t’i trembë pak turistët”, tha për AP-në Andreu Martinez , një protestues në Barcelonë . Qyteti ka një popullsi prej 1.7 milionë banorësh , krahasuar me 15.5 milionë vizitorë vitin e kaluar.
“Barcelona u është dorëzuar turistëve. Kjo është një luftë për t’ua kthyer Barcelonën banorëve të saj”, shtoi ai.
Martinez thotë se qiraja e tij është rritur me më shumë se 30%, pasi më shumë apartamente në lagjen e tij po u jepen me qira turistëve për qëndrime afatshkurtra. Ai thotë gjithashtu se ka pasur një efekt edhe zëvendësimi i dyqaneve tradicionale me biznese që u shërbejnë turistëve, siç janë dyqanet e suvenireve, vendet e hamburgerëve dhe të ngjashme.
“Po na nxjerrin jashtë sistematikisht”, thotë Martinez.
Rreth 5,000 njerëz u mblodhën në Palma, kryeqytetin e Majorkës, ku të dielën u zhvillua protesta më e madhe. Qindra të tjerë protestuan në Granada , në Spanjën jugore, dhe në qytetin verior të San Sebastianit , si dhe në ishullin e Ibizës .
Pati edhe protesta më të vogla në qytete me turizëm masiv si Venecia dhe Lisbona.
Qytetet anembanë botës kanë vite që po përpiqen të përballen me turizmin masiv dhe bumin e platformave të qirasë afatshkurtër si Airbnb, thekson AP.
Muajin e kaluar, qeveria spanjolle urdhëroi Airbnb të hiqte nga platforma gati 66,000 shtëpi pushimi me qira, të cilat sipas saj shkelnin rregullat lokale.
Ministri spanjoll i të drejtave të konsumatorit, Pablo Bustinduy, i tha AP-së se sektori i turizmit “nuk mund të rrezikojë të drejtat kushtetuese të popullit spanjoll” që mbrojnë të drejtën e tyre për strehim dhe mirëqenie.
Carlos Cuerpo , ministri i ekonomisë, shtoi në një intervistë të veçantë se qeveria është e vetëdijshme se duhet të merret me efektet anësore të padëshiruara të turizmit masiv.
