Me rastin e 26-vjetorit të çlirimit të Pejës, Rosaria Succurro, presidente e provincës së Kozencës në Kalabri, vlerësoi zhvillimin e vazhdueshëm të këtij qyteti. Ajo theksoi se Peja është një qytet i gjallë dhe dinamik, veçanërisht në aspektin e lëvizshmërisë urbane, ambientit dhe përfshirjes së fëmijëve dhe të rinjve në jetën qytetare.
Succurro rikujtoi gjithashtu mikpritjen e jashtëzakonshme të banorëve të Pejës që nga përfundimi i luftës, duke përmendur se Brigada e Shënjetarëve nga ushtria italiane ishte ndër të parat që hyri në territorin e Pejës pas luftës.
Ajo në Info Plus për RTK-në u shpreh se para dy vitesh ka nisur një komunikim dhe bashkëpunim zyrtar mes provincës së Kozencës dhe qytetit të Pejës. Ky bashkëpunim është formalizuar përmes një marrëveshjeje miqësore, e cila parashikon bashkëpunim në fushën e kulturës dhe turizmit.
Succurro nënvizoi edhe ngjashmëritë kulturore mes dy vendeve, duke theksuar se në provincën e Kozencës ekziston një komunitet i rëndësishëm arbëresh, që përbëhet nga rreth 21 fshatra.
Bashkëpunimi mes Pejës dhe Kozencës është forcuar edhe përmes shkëmbimeve artistike dhe kulturore, ku grupe muzikore nga të dy qytetet kanë vizituar dhe performuar në qytetet respektive, duke sjellë më afër dy komunitetet.
Në mbrëmje, Rosaria Succurro, presidente e provincës së Kozencës në Kalabri, do të shpallet Qytetare Nderi e Pejës, një nderim që ajo e ka pritur me emocion të veçantë.
“Është një emocion i madh për mua. Çdoherë që kam ardhur në qytetin e Pejës, jam ndier si në shtëpinë time. Me rastin e marrjes së këtij titulli, ky emocion bëhet edhe më i thellë. Nuk mund të ndihem ndryshe veçse krenare”, theksoi ajo për RTK.
Ky titull vjen si një shenjë mirënjohjeje për angazhimin e saj në forcimin e lidhjeve mes qytetit të Pejës dhe provincës së Kozencës, si dhe për kontributin e saj në promovimin e bashkëpunimit kulturor e turistik ndërmjet dy komuniteteve.
