Një grup i përfaqësuesve të Organizatave të Shoqërisë Civile kanë zhvilluar takim me përfaqësuesit e Lëvizjes Vetëvendosje. Ata janë pritur nga ministrja në detyrë e Drejtësisë, që është edhe kandidate për kryetare të Kuvendit, Albulena Haxhiu, ministri në detyrë, Hajrulla Çeku, sekretari i LVV-së, Alim Rama, si dhe këshilltari i kryeministrit në detyrë, Jeton Zulfaj.
Siç bëhet e ditur në komunikatën e lëshuar nga ta, thuhet se gjatë takimit ndanë opinionet lidhur me krizën politike dhe institucionale në vend. “U diskutuan mundësitë dhe mënyrat për zhbllokimin e situatës, në funksion të interesit publik dhe stabilitetit demokratik”, thuhet në komunikatë.
Ndër të tjera, kanë treguar se në takim, si përfaqësues të OJQ-ve, theksuan rëndësinë që ka konstituimi i Kuvendit të ri. “Si parakusht për rikthimin e normalitetit institucional dhe funksionimin e mekanizmave demokratikë. Në një situatë sfiduese për vendin, Kuvendi mbetet hapësira themelore për përfaqësim, vendimmarrje dhe mbikëqyrje demokratike”, thuhet tutje aty.
Kanë thënë se shoqëria civile mbetet e përkushtuar të kontribuojë në lehtësimin dhe zgjerimin e dialogut ndërpartiak dhe ndërshoqëror, sipas tyre, si një hap drejt zgjidhjes së ngërçit aktual.
Ky grup i përfaqësuesve të OJQ-ve, gjatë ditëve të shkuara, kanë zhvilluar takime edhe me drejtues të partive të tjera politike, si dhe me presidenten e vendit, Vjosa Osmani.
