KRM “Pastrimi” ka njoftuar se Komuna e Prishtinës ka marrë zotim për pagesën e mjeteve të arkëtuara për shërbimin e grumbullimit të mbeturinave, shërbim i cili është kryer nga ndërmarrja për më shumë se katër muaj pa ndërprerje.
Ky obligim financiar është konfirmuar me vendim gjykate, që njeh vlefshmërinë e kontratës dhe punës së kryer nga “Pastrimi”. Pagesa për mbeturinat duhet të bëhet drejtpërdrejt në KRM “Pastrimi”, sipas rregullores së Kuvendit Komunal, vendim ky që është validuar nga Gjykata Supreme e Kosovës.
Komuna është zotuar të bëjë pagesën prej 2.5 milionë euro, që i detyrohet ndërmarrjes, përmes procedurës së ndërmjetësimit ose gjykatës, brenda dy javësh.
KRM “Pastrimi” thekson se ky zotim duhet të formalizohet dhe të nënshkruhet sa më parë, për të garantuar stabilitetin financiar të ndërmarrjes, mbrojtjen e të drejtave të punëtorëve dhe ofrimin pa pengesa të shërbimeve për qytetarët.
Në fund, ndërmarrja falënderon punëtorët për qëndrimin dinjitoz dhe të palëkundur, si dhe qytetarët për mirëkuptimin dhe përkrahjen, duke u zotuar që shërbimi të jetë i pandërprerë dhe me standarde të larta.
Në anën tjetër, nga Komuna e Prishtinës kanë bërë të ditur se sot janë pajtuar me punëtorët e KRM “Pastrimi”, por theksuan se kjo nuk do të thotë se pajtohen me qasjen e menaxhmentit aktual të ndërmarrjes. Sipas komunës, menaxhmenti ka kontribuar drejtpërdrejt në përkeqësimin e situatës me mbeturinat në kryeqytet, duke përfshirë edhe dezinformimin e punëtorëve për agjenda të caktuara politike, gjë që ka lënë qytetin pa shërbim të mbledhjes së mbeturinave dhe ka rrezikuar shëndetin publik.
“Prandaj, sikur që e kemi thënë më parë para përfaqësuesve të punëtorëve të KRM ‘Pastrimi’, ne mbetemi të përkushtuar për një zgjidhje të drejtë, ligjore dhe në shërbim të qytetarëve dhe punëtorëve të ndërmarrjes”, thuhet në njoftim.
Komuna ka theksuar se ka ofruar këto zgjidhje, të cilat janë pranuar edhe nga punëtorët:
Çështjen e pagesës për shërbimet e kryera nga janari deri në maj do ta adresojnë në gjykatën kompetente, me shpresën që ajo të zgjidhet përmes marrëveshjes ose ndërmjetësimit.
Pas vendimit të Gjykatës Supreme, KRM “Pastrimi” do të bëjë inkasimin vet për shërbimin e mbledhjes së mbeturinave.
Mjetet e inkasuara nga kryeqyteti gjatë kësaj periudhe do të transferohen menjëherë tek ndërmarrja “Pastrimi”.
Të gjithë qytetarët e Prishtinës që kanë kryer pagesat gjatë këtij viti në kryeqytet, lista e të cilëve do t’i përcillet ndërmarrjes “Pastrimi”, do të kenë pagesat e tyre të njohura dhe të pranuara nga ndërmarrja.
