Një video shqetësuese po qarkullon në rrjetet sociale ku shihet momenti kur një djalë dyvjeçar qëllon aksidentalisht nënën e tij pasi i mori armën të atit, raportuan mediat braziliane. Pamjet e kamerave të sigurisë nga një shtëpi familjare në shtetin brazilian të Mato Grosso do Sul tregojnë djalin duke marrë armën nga një tavolinë dhe duke tërhequr këmbëzën ndërsa nëna e tij kthehet për t’u përballur me të.
Prindërit ishin ulur dhe po bisedonin dhe nuk e vunë re djalin që po merrte armën Glock 9 mm. Videoja tregon plumbin që e godet gruan në gjoks dhe në krah. Më pas ajo u ngrit, por shpejt ra në dysheme. Djali vrapoi drejt nënës së tij, ndërsa babai e mori armën nga dyshemeja.
Babai do të akuzohet për vrasje të paqëllimshme.
Gruaja është identifikuar si 27-vjeçarja Deborah Rodrigues Monteiro dhe fotoja e saj është publikuar në mediat braziliane. Policia ka hapur një hetim urgjent dhe ka konfirmuar se babai i djalit, një fermer me leje për armëmbajtje, do të akuzohet për vrasje të paqëllimshme.
Sipas mediave lokale, djali ka shumë të ngjarë të përfshihet në një program këshillimi psikologjik. Ende nuk dihet nëse ai do të qëndrojë me të atin apo do t’u dorëzohet shërbimeve sociale.
Shefja e policisë lokale, Danielle Felismino, konfirmoi se gruaja u dërgua në spital, ku u shpall e vdekur. Policia sekuestroi armën dhe municionin, dhe një autopsi u krye të shtunën në mëngjes, një ditë pas tragjedisë. Rezultatet nuk janë publikuar ende. Banorët e tmerruar të qytetit dhe komunës së Rio Verde de Mato Grosso shprehën ngushëllimet e tyre familjes në mediat sociale.
