Duke komentuar situatën në Lindjen e Mesme, Trump tha se të gjithë banorët e Teheranit duhet të evakuohen.
“Irani duhej ta kishte nënshkruar marrëveshjen. Unë u thashë ta nënshkruanin. Çfarë turpi, çfarë humbjeje jetësh njerëzore. Thënë thjesht – Irani nuk mund të ketë armë bërthamore. E kam thënë vazhdimisht. Të gjithë duhet të largohen menjëherë nga Teherani”, tha Trump.
Gjithashtu, në statusin vijues, Trump kritikoi ish-aleatin e tij Tucker Carlson, të cilit i tha se Irani nuk mund të ketë armë bërthamore.
Zëdhënësja e Shtëpisë së Bardhë, Carolina Leavitt, foli gjithashtu pak më parë, duke thënë se Trump ishte larguar herët nga takimi i G7-ës.
“Presidenti Trump pati një ditë të mrekullueshme në G7, madje duke nënshkruar një marrëveshje të madhe tregtare me Mbretërinë e Bashkuar dhe kryeministrin Keir Starmer. U arrit shumë, por për shkak të asaj që po ndodh në Lindjen e Mesme, Presidenti Trump do të largohet sonte pas darkës me krerët e shteteve”, tha ajo.
Edhe pse Shtëpia e Bardhë nuk foli për detajet, shumë supozojnë se kjo mund të nënkuptojë që Shtetet e Bashkuara të Amerikës do të jenë të përfshira drejtpërdrejt në anën e Izraelit në ngjarjet në Iran dhe se ekziston mundësia e sulmeve që do të synonin objektet bërthamore të Iranit.
Megjithatë, duhet të merret në konsideratë edhe fakti se pak para statusit të Trump, nga disa burime perëndimore u shfaqën informacione se Trump synon t’i ofrojë Iranit një marrëveshje të re. Në këtë kontekst, statuset e Trump mund të karakterizohen edhe si krijim i presionit shtesë mbi qeverinë në Teheran në kontekstin e marrëveshjes bërthamore.
