Kryeministri izraelit Benjamin Netanyahu ka kërkuar përfshirjen aktive të Amerikës në këtë konflikt që nga fillimi i luftës Izrael-Iran. Arsyeja për këtë kërkesë nga Tel Avivi është, sipas Washington Post, bomba amerikane GBU-57, e njohur si “bunker buster”.
Kjo gazetë amerikane shkruan se kjo armë e fuqishme është arsyeja kryesore për kërkesat e Netanyahut ndaj Uashingtonit dhe se ata mund ta përdorin atë për të synuar objektet bërthamore të Iranit që ndodhen nën tokë.
Në këtë kontekst, bomba GBU-57 është e rëndësishme, një armë 13.6 tonëshe e njohur edhe si MOP (Massive Ordnance Penetrator) që ka aftësinë të “varroset” në tokë dhe më pas të shpërthejë.
Edhe pse është arma më e rëndë konvencionale në arsenalin amerikan, kjo bombë nuk është projektuar për të shpërndarë eksplozivë në një zonë të gjerë.
Komandantët mbështeten në precizitetin e saj të udhëhequr nga GPS për të goditur objektiva specifike dhe të mbrojtura mirë dhe për të shkatërruar atë që bombat konvencionale nuk mund ta arrijnë. Sipas ekspertëve, nuk ka raportime publike për përdorimin e MOP në luftime.
Zyrtarët e Ministrisë së Mbrojtjes deklaruan se MOP është i aftë të depërtojë deri në 60 metra thellësi. Por tani besohet se është edhe më i aftë pas zhvillimit të mëtejshëm gjatë dy dekadave të fundit, tha për The Washington Post Trevor Ball, një ish-teknik i asgjësimit të municioneve shpërthyese të ushtrisë amerikane.
Edhe pse izraelitët janë mbështetur në municionet amerikane gjatë luftës shkatërruese ajrore në Gaza, Liban dhe Iran, avionët e tyre luftarakë nuk mund të mbajnë MOP. B-2 Spirit, një bombardues amerikan i fshehtë, është i vetmi avion i Forcave Ajrore Amerikane i aftë të përdorë MOP, sipas shërbimit.
Sipas Forcave Ajrore, 19 avionë B-2 janë aktualisht në funksion. Edhe pse fluturon me shpejtësi subsonike, B-2 mund të furnizohet me karburant në ajër, duke i lejuar atij të fluturojë në distanca të jashtëzakonshme.
Gjatë luftës në Kosovë në fund të viteve 1990, pilotët e B-2 fluturonin vajtje-ardhje nga baza e tyre ajrore Whiteman në Misuri për të goditur objektiva. Në vitin 2017, dy B-2 fluturuan për 34 orë për të goditur kampet e Shtetit Islamik në Libi.
Përmirësimet e fundit të MOP përfshijnë adresimin e një “problemi integrimi” të përshkruar në mënyrë të paqartë me avionin B-2, tha Forca Ajrore vitin e kaluar.
Shërbimi tha gjithashtu se po teston teknologjinë që mund të ndihmojë në shkatërrimin e objektivave në rastet kur inteligjenca mbi strukturat nëntokësore është e kufizuar. Siguresa inteligjente në MOP mund të zbulojë zgavrat gjatë rrugës së saj poshtë, siç janë dhomat dhe dyshemetë, dhe të shpërthejë në momentin optimal, tha Ball.
