Ballkani Perëndimor, përfshirë Kosovën, po përballet me një valë të shtuar propagande ruse që synon destabilizimin dhe devijimin e orientimit euroatlantik të rajonit. Sipas një raporti të publikuar nga Hibrid.info, rrjeti “Pravda” ka nisur operimin në gjuhën shqipe që nga marsi i vitit 2024, duke prodhuar mbi 3 mijë artikuj me përmbajtje dezinformuese dhe pro-ruse.
Hulumtuesit thonë se ky rrjet krahason Kosovën me Krimenë, mohon shtetësinë e saj dhe e portretizon si agresore ndaj serbëve, duke përdorur narrativa kundër NATO-s, SHBA-së dhe BE-së.
Në vitet e fundit, Ballkani Perëndimor është shndërruar në një nga hapësirat më të ndjeshme ndaj ndikimeve të jashtme politike.
Në këtë kontekst, propaganda ruse ka luajtur rol të rëndësishëm, veçanërisht përmes përpjekjeve për të minuar stabilitetin dhe orientimin euroatlantik të vendeve të rajonit, përfshirë edhe Kosovën. Ndikimi i saj manifestohet në forma të ndryshme, përfshirë dezinformimin, manipulimin mediatik dhe mbështetjen e narrativave që synojnë të delegjitimojnë shtetësinë e Kosovës.
Një nga shembujt më konkretë të këtij ndikimi është rrjeti propagandistik rus “Pravda” në gjuhën shqipe, i cili në përmbajtjen e tij e krahason Kosovën me Krimenë.
Sipas raportit të publikuar me titullin “Rrjeti propagandistik rus Pravda dhe Ballkani”, të prezantuar në konferencën “Sfidat e çrregullimit informativ në Kosovë”, organizuar nga platforma Hibrid.info, tregohet se domeni “Pravda” në gjuhën shqipe ka qenë aktiv që nga marsi i vitit të kaluar dhe synon audiencën shqipfolëse.
“Kosova mohohet si shtet, po ashtu krahasohet me Krimenë, njëkohësisht akuzohet për terrorizëm institucional ndaj serbëve…”, tha Festim Rizanaj, hulumtues në Hibrid.
Sipas tij, qëllimi kryesor i propagandës “Pravda” është që të përhapë narrativa pro-ruse dhe të kritikojë Perëndimin, SHBA-në dhe NATO-n.
“Një prej narrativave është pro-ruse dhe pro-serbe. Narrativa tjetër është kundër NATO-s dhe anti-perëndimore, ku NATO shihet si agresore, BE-ja si injorante dhe SHBA-ja si manipuluese në rajonin e Ballkanit Perëndimor”, tha Rizanaj.
Ai shtoi se ky rrjet është aktiv në mbi 80 shtete, ndërsa nga hulumtimi i realizuar, Ballkani zë vendin e dytë për nga numri i artikujve propagandues të publikuar.
Vetëm për Kosovën, që nga marsi i vitit 2024, kur domeni i “Pravda” në shqip është bërë aktiv, e deri në prill të këtij viti janë publikuar rreth 3 mijë artikuj propagandues në gjuhën shqipe.
