Lëvizja Vetëvendosje ka vlerësuar se projekti për ndërtimin e dy urave të reja mbi lumin Ibër që lidhin jugun dhe veriun e Mitrovicës do të lehtësojë qarkullimin e qytetarëve dhe do të shërbejnë si infrastrukturë për komunikim, integrim dhe zhvillim ndërmjet dy pjesëve të qytetit.
Ky projekt do të realizohet në kuadër të Memorandumit të Bashkëpunimit mes Ministrisë së Mjedisit, Planifikimit Hapësinor dhe Infrastrukturës dhe Komunës së Mitrovicës së Veriut.
Ndonëse nuk janë dhënë detaje lidhur me këtë projekt, LVV në një postim në Facebook, përmes një fotografie ilustruese ka shpalosur se si do të duken dy urat e reja që pritet të ndërtohen mbi Ibër.
Nënshkrimi i Memorandumit të Bashkëpunimit u realizua dje ndërmjet ministrit Liburn Aliu dhe kryetarit të Mitrovicës së Veriut, Erden Atiq.
