“Netanyahu nuk është president i Shteteve të Bashkuara të Amerikës. Ai nuk duhet të përcaktojë politikën e jashtme dhe ushtarake të Amerikës. Nëse populli i Izraelit e mbështet vendimin e tij për të shkuar në luftë me Iranin, kjo është puna e tyre dhe lufta e tyre. Shtetet e Bashkuara nuk duhet të jenë pjesë e saj”, shkroi Sanders në rrjetin X.
Të hënën, Sanders prezantoi një legjislacion që do të ndalonte përdorimin e fondeve federale për veprime ushtarake amerikane kundër Iranit pa autorizim të shprehur nga Kongresi.
Projektligji, i titulluar “Akti i Luftës kundër Iranit”, përmban një përjashtim për rastet e vetëmbrojtjes, siç përcaktohet në Aktin e Pushteteve të Luftës dhe në legjislacionin përkatës të SHBA-së.
Senatorët Peter Welch, Elizabeth Warren, Jeff Merkley, Chris Van Hollen, Ed Markey, Tammy Baldwin dhe Tina Smith iu bashkuan Sanders në mbështetjen e këtij legjislacioni.
Presidenti Donald Trump la të hapur të mërkurën mundësinë që SHBA-të t’i bashkohen sulmeve të Izraelit ndaj Iranit, duke thënë se atij “i është sosur tashmë durimi” me Teheranin. “Kjo është arsyeja pse bëjmë atë që bëjmë”, deklaroi ai.
Tensionet rajonale janë përshkallëzuar që nga e premtja, kur Izraeli kreu sulme ajrore në disa vende në Iran, duke përfshirë objekte ushtarake dhe bërthamore, duke bërë që Teherani të hakmerret.
